Shillong, Risaw 02: Ka Raj Bhavan Shillong hynne ka sngi Balang kala sakhi iaka jingwan tuid ki paidbah naduh ka por 5 baje mynstep haba ki nongmareh ha ki rta bapher bapher kila wan aikyrteng ialade ban iashimbynta ha ka 5.5 km Swachhata Run hapoh jong ka Swachhata Hi Seva ban rakhe iaka lyngkhuh sngi kha u Mahatma Gandhi.
Palat 1500 ngut kila wan iashimbynta ha ka Swachhata Run kaba la pynlong da ka Raj Bhavan bad ka Central Bureau of Communication (CBC) Shillong ryngkat ka jingiatreilang bad ka District Sports Office, East Khasi Hills.
U Lat ka jylla u C.H. Vijayashankar ula kaweh ia ka lama jong ka jingsdang iaka jingiakob mareh kaba la pynlong da ka jingthmu ban pynsngewthuh paidbah bad ban kyntiew ia ka Swachhata Hi Seva hapdeng ki paidbah la ong u Lat ka jylla.
Ula pynpaw ruh ia jingsngewtynnad ba bun ngut ki briew kila mih ban wat hapdeng ka jingjaw slap ban iashimbynyta ha katei ka jingiakob mareh.
Kane ka 5.5-km Swachhata Run kala sdang na Raj Bhavan bad ki nongmareh kila leit mareh sha St. Anthony’s College, Shillong College, St. Mary’s College, Don Bosco Square, Laitumkhrah Market, Fire Brigade, St. Edmund’s School, Malki Point, Barik Point, Civil Hospital, Main Secretariat, DC Office bad kila wan ban pynkut biang ha Raj Bhavan.
Ha ka Open Category (Men) u Bah Daniel L Walang ula wan nyngkong, uba wan ba-ar u dei u Nahtei Wangnao bad u Dasaman Khyndait ula wan balai.
Ha ka Open Category (Women) ka Marqueenless Ramsiej kala wan nyngkong, ba-ar ka kong Phyrnai Khyndait bad ka kong Dapliss Wahlang kala wan balai.
U bah Daniel L Wahlang ula hsim por 17.15 minit ban pyndep ia ka jingmareh katba ka kong Marqueenless Ramsiej kala pyndep ia ka jingmareh ha ka 22.25 minit.
La sam ruh ia ki khusnam sha kito ki nongmareh kynthei bad shynrang kiba la palat ia ka 50 snem ka rta.
Hadien ba la dep pynlong ia ka Swachhata Run la pynlong iaka jingthung dieng hapoh jongka Ek Ped Maa Ke Naam, ha kaba u Lat ka jylla ula thung ia u dieng ha Ward’s Lake bad ha Raj Bhavan.
Katei ka Campaign kaba la pynlong ha ka ri baroh kawei kadei da ka jingthmu ban iada iaka mariang bad ban tei iaka lawei kaba jyrngam bad kaba seisoh.
Ha ka jingrakhe iaka Gandhi Jayanti ha ka Durbar Hall, u Lat ula leit buh syntiew ban kynmaw burom ia u Mahatma Gandhi bad ia u Lal Bahadur Shastri ha kansgikha ka jongki.
U Lat ula aiti ruh iaka cheque kaba mar T.1, 11,000 sha ki 4 tylli ki Gandhi Kendras kiba kynthup ia ka Laitkroh Kasturba Gram Seva Kendra, Tuber Kasturba Gram Seva Kendra, Jambal Kasturba Gram Seva Kendra bad Magupara Kasturba Gram Seva Kendra.
U Lat ka jylla ula sam ia ki khusnam sha ki nongjop haka Essay Writing bad Art Competitions kaba la pynlong da ka CBC Shillong, National Book Trust of India (NBT) bad ka District Education Office, halor ka phang Swachhata bad Poshan na ka bynta ki khynnah skul jongka East Khasi Hills.
Nalor kane, u Lat ula pyllait ruh iaka Mobile Library jongka National Book Trust na ka phyllaw jong ka Raj Bhavan, katba ka National Institute of Fashion Technology (NIFT) Shillong bad ka Tnad Sericulture kila pyninam ia ki jingthain da ki kti bad ia ki tiar thain bad ia ki jain Khadi ha kane ka sngi.
