SHILLONG, MAY 20: Ka Director General of Police (DGP) ba thymmai ka jylla Meghalaya ka Kong Idashisha Nongrang kala pynpaw ba kam iahap jingmut bad ka jingdawa ba ka jylla Meghalaya kan don noh ia la ka jong ka adre haka kam pulit.
“Kam long ka jingai jingmut kaba bha, balei namar lada phi peit ngi dei ka jylla kaba rit bad ngin don ia ka cadre kaba rit bha. Bun ki briew kim tip satia ba ka don ka jingpyntreikam da ka Roster System ne pali thungkam ha ka sorkar India, ha kaba tang kawei na ki 3 bynta na ka kam kaba lait yn lah ban leit sha ki trai jylla ne kino kino kiba shong basah hapoh ka jylla” ong ka Kong Nongrang haba iakren bad ki nongthoh khubor hynne ka sngi Nyngkong.
Kala ai nuksa da kaba iathuh “Ka jylla Nagaland ka don ia ka Cadre kaba rit bha bad ka dei kaba don la ka jong ka Cadre, hynrei katno ngut pat kiba ioh rung ha ka Nagaland Cadre namar ba ka Insider Vacancy ka mih tang ha man la ki 3 tylli ki kam kiba lait bad man la ka snem ka jinglait kam ka long tang kumba kawei ka kam bad kam long kaba thikna ban don ka jinglait kam man la ka snem, kumta phin ioh ia ka Insider Vacancy tang shisien ha ka 3 snem ne shisien ha ka 5 snem, kumta ha katei ka rukom phin duhnong bha”
Kala bynrap, “Ka Joint Cadre kaba ngi donlang bad ka Assam ka kham bun bha bad ka jylla Meghalaya kam dei satia kawei na ki lai bynta jong ka jylla Assam ne ka jingkhlain jongki Cadre ki jongki. Kumta lada ngi ioh noh ia la ka jong ka Cadre, nga lah ban pynthikna ba ngan ym ioh long kum ka DGP jong ka jylla Meghalaya. Ha ka por ba nga la pyndep ha u snem 1992 kila don tang 3 tylli ki kam kiba lait na ka bynta ka Joint Cadre bad namar ba ki don 3 tylli ki kam kiba lait, iwei ila leit lyngba ka ‘Insider’ bad nga dei tang ma nga hi ita i ‘Insider’ kaba la ioh rung bad dei ha katei ka rukom nga la ioh ha la ka jong ka jylla”.
“Nga don arngut ki paralok na Manipur bad kawei kaba ia pule lang kaba na Nagaland bad kitei kila poi long kum ki Cadre jong kiwei pat ym ha ka jylla lajong namar ba kam shym la don satia kano kano ka jinglait kam, katei kadei ka jingeh bad ki cadre kiba rit” la bynrap ka Kong Nongrang.
