Duwai lem na ka bynta jong nga, kyrpad u samla Hubert Paliar
Nongstoiñ, Risaw 7: Ki nongïalam ka Sur u Nongwest, hynne ka sngi thohdieng ki la aiti ïa ka song pisa ba kot haduh T. 73,230 kaba la ioh lum na ka jingianoh synñiang da ki paidbah West Khasi Hills ïa u samla Hubert Paliar, u samla u ban sa mih noh ha ka 12 tarik na ka Jylla sha ka International Arm Wrestling ka ban long ha ri Turkey.
Ïa kane ka song tyngka la aiti hynne ka sngi sha u Hubert Paliar ha ka jingïalang kaba lyngkot kaba la long ha ophis treikam jong ka Sur u Nongwest kaba don ha Nongstoiñ.
Ha ryngkat ka jingdonlang kiba haïing hasem lem bad ki nongthoh khubor, la pynlong ruh ïa ka jingïalang kaba lyngkot bad hadien la plied pat ïa ki lai tylli ki synduk thep pisa.
Hadien ba la plied, la ñiew ïa ki bin pa bin bad katkum kitei ki synduk, ka pisa baroh ka long 73,230 tyngka.
Na ka liang ki nongïalam ka synjuk kila kyntu ia ki bym pat noh synniang ba kin ïarap bad ïakynduh kyrpang ïa u Hubert Paliar, namar ha ka 12 tarik mynta u bnai un mih na ka Jylla.
Ki Nongialam kila kyrkhu kyrdoh bad kitbok kit rwiang ïa une u samla rangbah ba un ïoh ïa ka met kaba koit kaba khiah bad ba un poi sha ka thong. Kumjuh ruh ki la pynpaw ka jingkhublei sha kito baroh kiba la noh synniang na ka bynta une u samla jong ka thaiñ, namar ka jingdonkam shisha ïa ka jingïarap na baroh kiba don mynsiem.
U samla Hubert Paliar haba ai khublei ia baroh kiba la noh synniang bad kyrpad ba kin buh lem ha ki jingduwai na ka bynta ka jong u, ia kaba la shu batai da ki kti bad ba la pynshai pat da I kurim jong u sha kito kiba ïoh sngew haba ai khublei kyrpang eh ïa ki nongïalam ka sur Nongwest na ka bynta kane ka mynsiem ba ki don.
