Shillong, Risaw 18: Ka East Khasi Hills District kala rah ia ka nam lahduh ha ka 1st Annual Sports Meet jong ki National Health Mission Employees Association (NHM), Meghalaya, kaba la kut noh hynne ka sngi Saitjain ha Nongkseh Sports Ground.
Ha kane ka jingiakob ki nongiashimbynta kila pyni iala ka sap ka phong ialehkai bad ka mynsiem jong ka jingiajan kaba la lumlang ia baroh ki nongtrei ka koit ka khiah na kylleng ki bynta jong ka jylla kiba la iashimbynta ha ki jingiakob ki bapher bapher kum ka football, basketball, badminton bad ka jingiakob tan tyllai ne ka tug of war.
Ka East Khasi Hills District kala long ka lahduh da ka jingpyni ia ka jingiatreilang bad ka jingtbit kum ka kynhun ha katei ka lympung iakob.
Haba kren ha ka jingialang u MLA ka NPP na Mylliem u Bah Ronnie V Lyngdoh ula ong “Kane kadei ka sien kaba nyngkong eh ba la pynlong ia kum kane ka prokram bad kadei kaei kaei kaban sah ha ka histori bad ka khyllipmat kaba kmen ba sngewbha. Nangne shakhmat, nga ngeit skhem ba kane ka lympung iakob kan dang long shitrhem bad kaba don jingmut ban pynmih ia ka mynsiem jong ki nongialehkai bad kum ka kynhun ialehkai.
Ula kyntu ia baroh ba kidei ban shim ia kane ka sienjam ban noh synniang sha ka koit ka khiah ha ka imlang sahlang.
Katba u Political Secretary & OSD jong u Myntri Rangbah ka jylla, u Bah Daniel M Thangkhiew ula pynpaw ia ka jingsngewnguh ia ka NHM kaba la jied ia ka Nongkseh ban pynlong ia kane ka jingiakob ialehkai bad ula ong ba kala pynkhie im ia kane ka shnong bad ia ki paidbah bad ka shnong Nongkseh ka long kaba kloi ban pdiang ban pynlong ia kino kino ki jingiakob ialehkai ha ki snem ban wan.
Ula ong ba ka jingsakhi ia ka jingiatreilang kum ka kynhun bad kaj ingdon ia kaakor ka burom ha kine ki 3 sngi kala kren jam bad ka long ruh ka nuksa ia kiwei pat.
Ka Dr. B. Mawlong, Joint Director ka Health Services (MCH & FW), kala ai khublei ia ki nongtrei jong ka NHM kiba la pynlong ia kane ka jingiakob ialehkai kaba kmen ba sngewbha bad kala ong ba kane ka jingiakob kam dei satia ka jingiakhun kaba tang shi sngi hynrei kadei ruh ka jingrakhe ia ka jingdon ia ka bormet, jingiatylli bad ka mynsiem kum ki nongialehkai kaba tehsong lang ia baroh kum ka kynhun Shabar jong ki kynroh jong ki jaka treikam.
Ka Dr. Mawlong kala kubur ia ka jingshah teh shah khum ha ka kam bad ka jingtrei shitom ki nongtrei ka NHM bad kala ong ba ka jingtrei met bad mynsiem ka jongki ka long kaba kongsan bha ha ka jinglah ka jylla ban ioh ia ka jingjop ha ka jingpynlong ia ki Campaign ki bapher. Kala pynpaw ruh ia ka jingkongsan ban don ka jingkhih jong ka met ka phad kaban pynduna ia ka jingkhia na ka jingpang Non-Communicable Diseases (NCD) bad ki jingialehkai ki iarap ban tei ia ka bor pyrkhat pyrdain bad ban tei ia ka koit ka khiah.
Ha kane ka jingialang la ioh ruh ia ka jingkren na ka Ibamonlang Nongbri ka State Program Manager, NHM, Meghalaya, u Bah Kmembhalang Khongwir u Internal Advisor ka NEAM bad kiwei kwiei.
La pynkut ia kane ka lympung iakob da kaba kular ruh ban wanphai biang ha ka por ban wan bad ban bteng ia ka rukom ban rakhe ia ka koit ka khiah, ka jingshakri bad ka jinglong kum ki nongialehkai.
, Meghalaya, kaba la kut noh hynne ka sngi Saitjain ha Nongkseh Sports Ground.){kind=link}