Shillong, Naitung 13 : U Myntri Rangbah Conrad K Sangma ha ka sngi Nyngkong ula ban jur ba ka Sorkar Jylla ka dang bteng ban pyrshah ia ka jingtih uranium ha Meghalaya.
Haba jubab ia ki jingkylli halor kane ka kam, u Myntri Rangbah ula ong ba ka nongrim jong ka Sorkar hi ka dang iai long beit kumjuh.
“Nga la kren shai, Nga la kren ia kajuh shi kajuh ba ka Sorkar jong ngi kala kren shai kdar ba ngi la ong em ia ka jingtih uranium hapoh ka Jylla jong ngi” ong u Conrad.
Kane ka jingkren u CM kala mih hapdeng ka jingiai mih ki jingpyrshah na ki kynhun sengbhalang kiba pyrshah ia kano kano ka sienjam ban ailad ia ka jingtih uranium hapoh ka Jylla.
Ka Sorkar kala iengskhem ba kan ym ai jingbit satia ia kano kano ka jingtyrwa ban tih uranium ha jylla Meghalaya.
