Shillong, Naitung 11 : U Myntri Rangbah Conrad K Sangma ha ka sngi Nyngkong ula ong ba ka jingpynieng ia ka Entry-Exit Point ha Umling kam dei satia ka jingeh, hynrei ban wanrah ia ka ain ban leh ia ka jingkhmih bniah, ka dei ka jingeh.
U Myntri Rangbah ula jubab halor ka jingkren jong u Myntri kam Jngohkai Tomithy D Shira halor ka jingbuh ia ka Tourist Registration Centre ha Umling, kaba wan hapdeng ka jingpyrshah kaba jur ban pynkylla ia ka Facilitation Centre sha ki food court bad ka jingdawa ban buh ia ka entry-exit point ka ban pyrrkhing ia ka jingrung kyrthep ki briew nabar ka Jylla.
“Ka jingbuh ia ka entry-exit point kam dei satia ka jingeh, Ngi lah ban pynieng mynta mynta ruh, ngi lah ban pynieng lashai ruh. Ka jingkylli ka long halor ka jingdon ia ka ain ban pyntreikam bad ban leh ia ka jingkhmih bniah kaba dei ban leh” ong u Conrad haba iakren bad ki nongthoh khubor.
Ula ong ba ka jingeh ba shisha hi ka shong ha ka jingpyntreikam.
“Kumta, ka dei hangne ba don ka jingeh bad ka jingtynjuh bad dei namar kine ba ngi kyrmen ba ka Amendment jong ka Meghalaya Residents, Safety and Security Act (MRSSA) kan shah ia ki ba kin don ia ka ain kaba lah ban leh ia kine kiei kiei baroh” ula ong.
U Myntri Rangbah ula ban jur ba tang ka jingtei marwei kan ym lah ban weng ia ka jingeh.
“Ban pynieng ia ka khyrdop kam dei ka jingeh hynrei ban pyntreikam ia ka ha kaban khmih bniah ka dei ka jingeh ba hakhmat eh. Ban plie ia ka khyrdop lashai ka sngi bad buh ia ki briew ban shong hangtei kan ym weng ia ka jingeh” ong u Conrad.
Ula mynjur bad ka jingkren u Myntri kam Jngohkai ba donkam ka Registration Centre, hynrei ula bynrap ba ka jingtreikam bha ka shong eh ha ka jingkyrshan ka ain.
