Kyrshan u CM ia ka synshar khadar ba don da ka thong ha ka jingialang Shillong e-Gov

Shillong, Naitung 13 : U Myntri Rangbah Conrad K Sangma ha ka sngi Nyngkong ula ong ba ki jingkylla ba shisha ha ka rukom treikam ka Sorkar (work culture) kan wan na kaba buh ia ka thong, ka jingkhmih bniah ia ka jingiaid ki kam bad ban tynrong ia ka jingbahkhlieh, ym na kaba buh da ka por ban pyndep ia ki kam.

Haba kren shabar ka National Conference on “NextGen Administrative and e-Gov Reforms’ bala plie da u Myntri khynnah ka Sorkar Pdeng Dr Jitendra Singh ha Shillong, u CM ula ong ba kum kine ki rynsan ki iarap ia ki Ophisar ba kin ioh jinghikai na ki jingshem na kiwei pat ki Ophisar.

“Kiei kiei baroh ki dei ki jingpyrshang. Kaei kaba long kongsan ka dei ia ngi ba ngin pyrshah. Lada ngim pyrshang, ngin ym lah ban jam shakhmat ha ka jingim” ong u Conrad.

Ula bynrap ba ka jingpynbha ia ka rukom treikam ka dei ka kam kaba shim por.
“Ka rukom treikam ka shimpor ban pynthymmai, ban pynjanai –kiei kiei baroh kin shimpor. Hynrei nga tharai ka dei ka sienjam kaba biang bha bad ki dei ban iakynduh man ka por kum kane ka jingialang” ula ong.

U Myntri Rangbah ula ban jur halor ka rukom treikam ban ia kaba shu ai jingbthah.
“Kaei kaba long kongsan ka long ban wanrah ia ka rukom treikam kaba buh thong, kaba buh ia ka lynti ban peitthuh, ka rukom ai jingtip kaba biang. Shisien ba kine kila don, ka rukom treikam hi kan sdang ban kylla namar ki briew kin hap ban pyndep ia ki kam hapoh ka por bad ki dei ruh ban ai jingtip”.

“Ban bthah iano iano ba kin hap wan hapoh 5-10 sngi kam treikam satia. Da kaba ai ia ki briew ia ka thong bad ban kynjoh ia kineki jaka bad tyngrong ruh ia ka jingkitkhlieh, nga tharai ka dei ka lynti kaba biang em ban jam shakhmat. Kane ka dei kaba ngi pyrshang ban leh ha Meghalaya bad ngi la sdang ban iohi ia ki jingkylla” ula bynrap.

U Myntri Rangbah ula ai khublei ruh ia u Dr Singh namar ka jingjied ia ka Shillong ban pynlong ia ka Conference bad pynpaw ia ka jingkyrmen ba kan don ka jingmih kaba sngewtynnad bha.