Shillong, Naiwieng 29: Ngam don kano kano ka jingsngew mong ba nga khlem ioh ticket ban iakhun haka ilekshon MP 2024 naka National People’s Party (NPP) hynrei nga la rai ban trei shitom ban pynthikna ba ka kyrtong jong ka Party kan ioh ka jingjop.
Ia kane la ong da u MLA barim ka Mawsynram constituency Bah H.M Shangpliang haba bynrap ba u dap daka jingkmen ba ka Party kala jied daka Myntri Sorkar ka Kong Ampareen Lyngdoh ban iakhun haka ilekshon MP 2024 na Shillong Parliamentary Seat.
“Hoid nga ruh nga dei uwei naki ba kwah ban iakhun haka ilekshon MP 2024 naka NPP hynrei haba don bun ki nong pan ticket, ka pynpaw iaka jingroi jong ka Party, ka ticket ka don tang kawei, namar kata ka jingjied ruh ka long tang kawei. Nga sngew ba ka jingjied iaka Kong Ampareen, ka Party ka la leh bha bad kan long ka kyrtong ka ban poi shaka jingjop bad ma ngi bad ma nga ruh shimet ngan trei borbah ban pynthikna ba ka kyrtong jong ka NPP kan poi shaka jingjop” ong u bah H.M Shangpliang.
Haba kylli hato ka Party kala tyrwa ne em iaka ticket hashuwa ba un pyniasoh shaka NPP, u Bah H.M Shangpliang ula ong “Kam don ka jingshisha ba ong ba kala don ka jingpynbeit ban ai Ticket ia nga hynrei haka 13 tarik Nailur haka pyniasoh shaka NPP nga la kren ha baroh daka ba ong ba nga pyniasoh shaka NPP khlem da buh kyndon”.
U Bah Shangpliang ula ong ba un iai trei ban shakri iaki ba duk bad iaki nongrep kumba u ju shakri haka por ba u dang long MLA bad un nang iai rah iaki jingeh jong ki nongrep shaka Sorkar naka bynta ka bha ka miat ki ba duk bad ki nongrep jong ka Jylla.
Haba kylli hato yn iakhun ne em iaka ilekshon MDC, u Bah Shangpliang ula ong “Ngam iakhun haka ilekshon MDC hynrei ngan iai trei ban pynthikna ba ka NPP kan ioh jingjop haka ilekshon MDC”.
