Shillong, Naiwieng 29: Ka National People’s Party (NPP) hynne ka sngi kala thung iaki District President ba thymmai jong ki District hapoh ka Rilum Khasi bad Jaintia.
Haba pyntip ia kane, u Nongaiktien ka NPP u Bah H.M Shangpliang ula iathuh ba ka Party kala thung haduh 7 ngut ki President thymmai jong ki District hapoh ka Rilum Khasi bad Jaintia Hills.
Hynne ka sngi u State President ka NPP u Bah Prestone Tynsong ula thung ia u Bah Seiborlang Shadap kum u President ka East Jaintia Hills District, Octomewat Lamin President ka West Jainti Hills, Teibor Pathaw President ka Shillong City, Macmilan Byrsat President West Khasi Hills, Biolinda Nonglait President Eastern West Khasi Hills, Clement Mawlong President Ri-bhoi District bad u Bah Gavin Mylliemngap kum u President ka East Khasi Hills District, pyntip u bah H.M Shangpliang.
U Bah H.M Shangpliang ula iathuh ba ia kine ki 7 ngut ki President thymmai jong ki District hapoh ka Rilum Khasi bad Jaintia Hills la shim haka jingialang bad la wan shim bynta lang da baroh ki Wokring President jong ki District ia kaba la pyniaid da u State President ka NPP u Bah Prestone Tynsong u badei ruh u Symbud Myntri Rangbah ka Jylla.
Ula iathuh ba iaki President thymmai jong ki District hapoh ka Rilum Garo Hills yn pynbna ha ki sngi ban wan da u State President haka jingiatreilang bad u Working President ka Party ba khmih iaka Garo Hills.
“U State President ula kyntu iaki District President ba thymmai to thaw iaki District Committee ha kaba ki dkhot kin kynthup lang ki ba bat kam hapoh ka Party haka jingdon lang ki dkhot barim jong ki Committee” ula ong.
U Nongaiktien ka NPP ula pyntip ba hadien bala thaw iaki District Committee, yn thaw sa iaki Block Level ban sdang trei iaki kam ha man la ki shnong naka bynta ban pynkhlain iaka Party.
“U State President ula kynti iaki District President ba thymmai ba kidei ban phah iaki jingtyrwa (Proposals haka ne hashuwa 20 tarik Nohprah ban pynlong iaka jingialang jong ka State Level Committee bad ha kane ka jingialang yn sa iohpdiang ruh iaki kaiphod jong baroh ki Committee haka jingdonlang u National President ka NPP u badei ruh u Myntri Rangbah ka Jylla u Conrad K Sangma” ula ong.
