Shillong, Kyllalyngkot 05: U Myntri ka tnad jngohkai Bah Paul Lyngdoh hynne ka sngi Balang ula ong ba ka jingpynkynriah ia ki nongshong die madan kan nang shim por namar ka jingdon jong ka elekshon MDC ha rilum Khasi bad Jaintia.
Haba iakren bad ki noongthoh khubor, u Bah Paul Lyngdoh ula ong, “Namar ka jingdon ka elekshon MDC, ka jingtreikam jong kiba bun ki ophisar sorkar kala long bun ha ki kam kiba iadei bad ka elekshon bad wat ki Myntri kiba kynthup ia u Symbud Myntri Rangbah uba khmih ia ka kam pynroi sor”.
“Hynrei ula pynsngew bad nga ruh nga lah pynsngew ha u (DyCM) ha ka sien kaba la dep, ba ka kam kan sa iaid shakhmat hynrei kan long sa tang kato katne por bad ngi la iaid shakhmat ruh ban ithuh ia ki jaka kiba thymmai na ka bynta ki nongdie madan kaban sdang shwa nyngkong ha Khyndailad,” ula pyntip.
Ha kaba iadei bad ka jingbuh jingkylli ka kynhun ki nongdie madan halor ka rai kaba la shim tang da ka Provisional Town Vending Committee, u Bah Paul ula ong, “Kumba nga iathuh ia phi, ka Association ka dei kaba donbynta lang ha ka kam. Ngi lah iakren bunsien bad ki mynta la palat shi snem tam. Ka long kaba eh ban pynhun lut ia baroh hynrei ia ngi kaba nyngkong bad kaba hakhmat eh kadei na ka bynta ka bha ka miat jong ki nongshong shnong, baroh kiba pyndonkam ia ka surok bad ki lynti iaid kjat bad kumta ngi dei ban pynthikna ba ka bha ka miat kan dei ia baroh lang”.
Haba kylli la ka jingpynkynriah kan long ha ka 7 tarik u Rymphang, u Myntri Sorkar ula ong, “Ngi lah dep ban batai bniah ia ka thong bad iaka jingthmu ka jong ngi hynrei na ka bynta ki jingtip kiba bniah lah ban ioh na ka tnad Urban Affairs bad ka dei ka tnad kaba don ha ka kyrdan kaba biang bha ban jubab ia ka jingkylli ka jong phi”.
