Shillong, Naitung 06: U MLA ka PDF na Mylliem Constituency Bah Hamletsoh Dohling, ula nang phuhmut phuhmat ha ka jingpynkhreh ia ka elekshon MLA 2023, da ka jingwan pyniasoh ki Nongialam ba hakhmat jong u MDC ba mynta Bah Ronnie V Lyngdoh bad MDC barim Kong Teilinia Thangkhiew.
Ia kine ki Nongialam ba wan pyniasoh thymmai, la pdiang burom ha ka jingialang ba long hynne ka sngi balang ha Iingdorbar, Mylliem Kyndong.
Kine ki Nongialam kiba dei na ki 15 tylli ki jaka jong ka Mylliem, Them, kila iakynduh lang bad shim lang ia kawei ka rai ban ai jingkyrshan noh ia u Bah Hamletson, haba pynshong nongrim ia ki kam ba u la trei ha kine ki snem ka jinglong nongmihkhmat jong u.
U Bah Hamlet ula pdiang sngewbha ia kine ki Nongialam na kine ki artylli ki kynhun bad buh ia ka jingkyntu ba kin ia treilang ha ka elekshon MLA ban wan, ban ioh biang ia ka jingjop ka ban wanrah shibun ki jingmyntoi ia ki paidbah jong ka Constituency baroh kawei.
“Kum u MLA ha kine ki snem bala leit noh, nga la trei hok ia ka kam bala bynshet ha nga” ula ong ba da ka jingiawan lang jong kine ki Nongialam ban kyrshan ia u, ka pyni ba kila sakhi ba kumno ula treikam na ka bynta ki paidbah jong ka Constituency.
Ki Nongialam kiba la ai jingkren ha kane ka jingialang ki kynthup ia u Bah O Jyrwa, uba dei u Nongialam I Kong Teilinia Thangkhiew bad bah P Khonglam, Nongialam jong ka kynhun u Bah Ronnie V Lyngdoh bad kiwei kiwei.
