Shillong, Naitung 06: U MLA ka BJP bad Myntri Sorkar Bah Sanbor Shullai, ula pynpaw ia ka jingkmen halor ka elekshon President ka Ri bad ong ba ki paidbah ka Jylla bad baroh ki Jaidbynriew Riewlum ka Ri India ki dei ban kmen namar ka jingpynieng ka Sorkar BJP da ka riewlum ban long ka President ba thymmai ka Ri.
“Kane kadei ka sien ba nyngkong eh, ka ban thaw record hapoh ka Ri ba ka BJP hapoh ka jingialam u Myntri Rangbah Duh u Narendra Modi, kala jied ia ka Longkmie na ka Jaidbynriew Riewlum ban shimti ia ka shuki ba hakhlieh duh jong ka Ri” ong une u Nongmihkhmat ka BJP.
U Bah Sanbor ula pyntip “Ngi (BJP) la kyrpad ia baroh ki Nongialam jong ki party ha Jylla khlem da iakhein party, ba kin ai ka jingkyrshan ia kane ka kyrtong na ka jaidbynriew Riewlum”.
Halor ka jingkynthoh ka All India Trinamool Congress (AITC) ba ka BJP kam ju khuslai ne don jingsngew eiei ruh em ia ki paid Riewlum, u Bah Sanbor ula ong ba ka AITC kam dei ban shu kynthoh lamler.
Kane ka jingkynnoh ia ka BJP kala mih na u National General Secretary ka AITC u Abhishek Banerjee uba la ong ba ka BJP hi kam ju don jingsngew eiei halor ki kam thombor pyrshah ia ki paid riewlum hapoh ka Ri.
“Phah ia kane ka khubor sha u Abhishek Banerjee ba u dei ban kynmaw ba kane ka dei ka Meghalaya ym ka West Bengal. Kum kine ki jingkren kim dei satia kiba lah ban pdiang hangne” maham u Bah Sanbor.
