Ieid jaidbynriew te pyni da ki kam ym ban shu hylla ha surok: Prestone
Nongpoh, Lber 22: Katba nang jan ki sngi sha ka sngi thep vote jong ka eleksion Lok Sabha, ka National People’s Party (NPP) ka la nang khlain bad iohbor ha Ri Bhoi District da ka jingwan pyniasoh ki nongialam bad nongkitkam ka Congress bad UDP.
Ia kine ki nongialam ka Congress bad UDP la pdiang burom da u President ka NPP Meghalaya Bah Prestone Tynsong ha ka jingialang kaba la long ha Sajer, Nongpoh, Ri Bhoi District.
Kine kiba wan rung thymmai sha ka NPP ki ki kynthup ia u Working President ka UDP state level bad President ka Ri Bhoi District Bah Donbok Khymdeit u ba dei ruh u MLA/MDC barim ka Mawhati, ka MDC barim ka Nongpoh bad ka nongialam ka Congress Kong Rona Khymdeit bad kiwei kiwei.
Kiba la iadonlang ha kane ka sngi ki kynthup ia ka kyrtong MP ka Dr. Mazel Ampareen Lyngdoh, u National General Secretary Bah Sniawbhalang Dhar, ar ngut ki MLA ka NPP ba kynthup ia u Bah Sosthenes Sohtun bad u Bah Damanbait Lamare lem bad kiwei kiwei.
Haba kren ha kane ka sngi, ka Kong Ampareen Lyngdoh ka la pynpaw ia ka jingsngew kmen kaba khraw halor ka jin iohi jngai bad ka mon sngewbha ban pynkhlain ia ka party NPP hapoh ka District bad ka jylla hi baroh kawei da ki nongialam ka party UDP bad Congress, kiba la wan ban pyniasoh ialade sha la NPP.
Ka la ong ruh, ba kum ka kyrtong MP na ka NPP ka don shisha ia ka thong ban leit tied ia ka jingkhang bah ha New Delhi na ka bynta ki jingkylla jong ka jylla bad ki nongshong shnong jong ki 36 tylli ki Konstituensi ka Shillong Parliamentary Seat, da kaba bynrap ruh, “ngan long kum ka kmie bad MLA na bynta baroh kine ki Konstituensi bad ban btin lynti sha ka jingbha bad jing nang kiew ha baroh ki liang”.
U Bah Prestone Tynsong u la ai jingiaroh ia ki nongialam ka UDP bad Congress kiba la rai ban kylla noh ki nongialam ba radbah jong ka NPP kaba dei ka party kaba don ha syndah u paidbah ka jylla Meghalaya ym kum kiwei ki party kiba mlien tang ban hylla ha madan madiah bad ban pyrta ieid jaidbynriew tang da ka tyngam ym da ka kam.
U la ther ruh da kaba ong, ba kita ki party kiba pyrta ieid jaidbynriew ki dei ban leit buh office ha New Delhi kum ka NPP kaba don ia ka ophis pura, to mih ban iarap ia ki samla ba shah thok ha ki kam ki jam, wat shu kyrkait jaidbynriew shi jaidbynriew haba ki kam pat ym iohi syrngiew haei haei ruh.
Ula khot bad wer ia ki paidbah ba kim dei ban shu pynsep ei ia ka vote jong ki hynrei ban jied ia ka party kaba la pyni ia ki kam ym ba shu heh nia pathar.
“Lada ngi jop ha kine ki ar tylli ki MP seat, kine ki MP kin long ki pipe um ba heh ha ryngkat ka tanky kaba heh ban sam umbam umdih bad ban wanrah jingkyrkhu ia ka jylla hi baroh kawei”, ong u Bah Prestone Tynsong.
 ka la nang khlain bad iohbor ha Ri Bhoi District da ka jingwan pyniasoh ki nongialam bad nongkitkam ka Congress bad UDP.){kind=link}