New Delhi, Nailar 13 :Ki bor pulit ka Delhi ki la ioh ban kurup ia u drok ba la pynpoi na Myanmar bad u ba shongdor haduh kumba T.20 klur ha ki jaka iew beain ka pyrthei.
Ki pulit ki pyntip ruh ba ia une u drok u ba don ka jingkhia ka ba 4 kilo la pynpoi napoh Myanmar lyngba ka jylla Manipur.Ia une u drok la ioh ban kurup noh da ka kynhun na ka tnat pulit ba kyrpang ka Delhi.
Ki pulit ki la kem noh ia uwei u briew ha ka ba iadei bad kane ka jingioh kurup.Ia une u briew ba la tip kyrteng kum u Akhilesh Kumar Ray la kynnoh ba u dei u ba donkti ha ka ba pynpoi ia ki drok sha ki bynta jong ka Delhi bad kiwei pat ki jaka naduh kine ki 7 snem ba la dep.
Ka jingioh kurup ia une u drok ka la wan long ruh hadien ba ki bor pulit ki la ioh ia ka jingtip ka ba thikna halor ka jingdon jong ka kynhun ki nongkhaii drok bar ri ha ki bynta jong ka Ghazipur hapoh Delhi.Ia une u briew la kem noh najan kawei ka mall ka ba don ha katei ka thain.
Nalor kata la ong ruh ba kane ka kynhun khaii drok ka dei ka ba treikam bha hapoh Delhi, Uttar Pradesh, Bihar, Manipur bad Assam.
Une u briew ba la shah kem u la phla ruh ha ki pulit ba u dei ka bynta jong ka kynhun khaii drok ba u donkti ruh ha ka ba pynpoi drok hapoh Delhi,Uttar Pradesh, Bihar, bad Jharkhand. U la ong ruh ba u donkti ha ka ban pynpoi ia u drok heroin ha ryngkat ki arngut kiwei pat ki briew.
Shuh shuh u la kam ba uwei u briew ha Manipur ruh u dei u ba donkti bad ki bad u ba don ruh ia ka jingiadei bad ki nongkhaii napoh Myanmar.
