Shillong, Nailar 13: Ka Sorkar Jylla kala pynmih ia ka hukum hynnin ka sngi Thohdieng, ban khang ia ki Nongtrei Sorkar ban pynpaw ia ki jingsngew ne kynthoh lyngba ki lad pathai khubor ne Social Media kiba long pyrshah bad ki Policy ne ki programme jong ka Sorkar.
Kane ka hukum ka dei kaba la pynmih da ka Ophis I Commisioner & Secretary ka Tnad Personnel & AR (A) Kong R Lyngdoh.
Kat kum kane ka hukum la ong ba ki Nongtrei Sorkar naduh kiba don ha ki PSU, Board, Association, Corporation, Society kila pynkhein ia ka kyndon 8 jong ka Meghalaya Services (Conduct) Rules, 2019, lada ki kren sha ki lad pathai khubor lane pynmih ia ki jingkynthoh ha ki social media ba pynrem ia ki policy ka Sorkar Kmie ne sorkar Jylla.
Ka Sorkar kala maham ruh ba ka jingpynkhein ia kane ka hukum kan khring ia ka jingpynsajia ha ka Tnad kaba long ka jingpynkhein ia ka Rule 8 jong ka Meghalaya Services (Conduct) rules, 2019.
