Shillong, Naiwieng 11: U President barim ka Hynniewtrep Youth Council (HYC) Bah Robertjune Kharjahrin, un rung mynta ka sngi sha ka jylli sain pyrthei bad phaikhmat ban pan ticket na ka United Democratic Party (UDP) ban mih iakhun ia ka elekshon Lok Sabha, ban long ha u snem ban wan.
U Bah Robertjune u pyniasoh mynta ka sngi sha ka United Democratic Party (UDP) ha ka jingialang ka ban long ha Mawkyrwat.
Ia kane ka khubor ban pyniasoh u Bah Robertjune la pynthikna da u Nongialam ka UDP bad MLA ka Mawkyrwat Bah Renikton Lyngdoh Tongkhar.
Ka khubor ka iathuh ba kane ka sienjam jong u Bah Robertjune ka dei halor ka jingthrang ban mih iakhun ia ka elekshon Lok Sabha na Shillong Parliamentary Seat.
Ka khubor na ka UDP ka iathuh ba u Bah Robertjune ula ioh bha ia ka jingkyrshan na ki Nongialam ba hakhieh jong ka party ba kynthup ia u President Bah Metbah Lyngdoh bad kiwei kiwei ki Nongialam kynthup kiMLA.
U Bah Robertjune uba dei ruh u nongiasaid ain, ula iehnoh ia ka kam President ka HYC ha u bnai bala lah bad ia kane ka kam nongialam la shimti noh da u General Secretary Bah Roy Kupar Synrem.
Nalor u Bah Robertjune, sa arngut ki kyrteng kila paw ba ki kwah ia ka ticket jong ka UDP ban iakhun ia kane ka elekshon bad kine ki dei u President ka Khasi Author Society (KAS) Dr D.R.L.Nonglait bad u MLA barim ka Mawlai Bah PT Sawkmie.
Lah ban kdew hangne b aka UDP kala thaw ia ka kynhun synrop bad ka HSPDP, ia kaba la tip kum ka Regional Democratic Alliance (RDA) ban iasei ia u kyrtong monlang ha kane ka elekshon. Kumba long mynta, ka HSPDP kam pat sei satia ia uno uno u kyrtong ban long u kyrtong monlang ha kane ka elekshon ban wan.
 Bah Robertjune Kharjahrin, un rung mynta ka sngi sha ka jylli sain pyrthei bad phaikhmat ban pan ticket na ka United Democratic Party (UDP) ban mih iakhun ia ka elekshon Lok Sabha, ban long ha u snem ban wan.){kind=link}