Shillong, Naiwieng 11 : U Myntri ka Tnad Bording Abu Taher Mondal ula ong ba ka Tnad kala shimkhia bha ban pynthikna ba baroh ki kompani mobile service provider, kin siewkhuid lut ia baroh ki bai bording ba pynsahteng khnang ba kin lait na ka jingshah otbording.
Haba iakren bad ki nongthoh khubor, u Mondal ula ong “Ngi la buddien beit bad ki (mobile service provider)”.
U Myntri u pyntip ba ki don na kine ki kompani kiba la siew khuid ia ka bai bording hynrei ki don ruh ki bym pat lah siew. “Hynrei, kane ka kam ka dang iaid mynta” ula ong.
Halor ka jingkylli, u Myntri ula ong “Ngim kwah ban buh jingeh ia ki paidbah da ka jingot bording syndet syndet ia ki tower jong kine ki kompani namar ka lah ban pynduh syndon ia ki network”.
Kine ki kompani kila pynieng ia ki mobile tower ha kumba 200 tylli ki jaka ha kylleng ka Jylla. Ki don ki kompani kiba pyn ieng bun tylli ki mobile tower bad kine ki kompani kila siew pat tang ia uwei u towew bad pynsahteng pat ia kiwei.
U Myntri u pyntip ba kila don ki jingkyrpad thymmai ba wan sha ka Sorkar ban ai bording sha ki tower hynrei kane ka kam ka dang don hapdeng ka jingbishar.
