Agartala, Nailur 09 : Katba ka ilekshon sha ka iingdorbar assembly kala nang jan ha ka jylla Tripura ba la synshar da ka seng BJP, ki kam iaumsnam sain hima ha kane ka jylla kila nangkiew sted katba nang mih ki sngi.
Hynnin ka sngi Palei da ki phew ngut ki nongtrei jong ka liang pyrshah CPI (M) bad ka party synshar BJP kila ngat ha ki jingmynsaw hadien ka jingiakynad hapdeng ki nongkyrshan jong kine ki artylli ki party hapoh Bishalgarh kaba hapoh Sipahijala district ka Tripura.
Kane ka jinglong jingman kala poi ha une u pud hadien ba la kynnoh ba ki nongtrei ka BJP kila sdang ban thombor ia ki dkhot jong ka Left party katba ki dang mih noh na ka jingialang sain hima ha katei ka jaka.
“Ki nongtrei ka BJP kila thombor ia ki briew ki jong ngi khlem kano kano ka daw bad kane kala pynlong ruh ia ki nongtrei ki jong ngi ba kin iakhun pyrshah.Kane ka party synshar kala shah pynjngai na u paidbah bad dei na kane ka daw kila leh da ki kam pyntriem pyrshah ia ki party sain hima kiba ieng pyrshah.Kim tip satia ia ka nongrim jong ka synshar paidbah,” ong u state secretary ka CPI (M) uJitendra Chowdhury.
Da kaba pynpaw halor katei ka kam thombor ka bym don nongrim, u Chowdhury ula ong; “Ngi la pynlong ia ka jingialang paidbah kaba la dep ban pynbna kham hashwa. Ngi la pynlong ia ka rally ha Bishalgarh hadien ba ki pulit kila pynsangeh noh.Ban kiar na kano kano ka jingialeh pyrshah bad ki bor jong ka ain, ngi la kyntu ia ki bor sorkar ba kin pdiang ia ki jingthoh kiba iadei bad ki jingdawa ha ka jaka ba la pynsangeh noh ia ka rally.”
“Na ka liang ki heh sorkar kila wan poi bad hadien ka jingiakren kaba tang shiphang, ka pynkut noh ia kane ka prokram. Hynrei ki kynhun runar ba la kyrshan da ka BJP kila thombor ia ki nongtrei ka party jong ngi ha ki kylleng ki jaka hadien katei ka jingialang.
Namar ka jingsngew buhkhoh halor kane ka jingshah thombor ki para dkhot, kumta ruh ki katto katne ki nongtrei jong ka Left kila pynphai markylliang,” ong shuh shuh u secretary.
Hynrei, watla katta na ka liang ki nongialam ka BJP hapoh ka thain kila kyntait ia kane ka jingkynnoh jong ka CPI (M) halor ka jingpynmih huri hura ha ki bynta jong ka Bishalgarh.
“Arngut ki briew jong ngi kila ngat ha ka jingmynsaw kaba kham jur.Ym shym la don ki dkhot ka BJP kiba leh ia ki kam thombor. Baroh ki nongshong shnong ha Bishalgarh ki iohi kumno ba ki nongtrei ka Left ki deng ha ryngkat ki helmet bad rah da ki dieng ban thombor pyrshah ia ki nongtrei ka BJP,” ong u nongialam ka BJP.
