Shillong, Lber 13: Ka sorkar pdeng kala mynjur ban bhah shuh shuh iaka pisa sa T47.326 Klur iaka jylla Meghalaya lyngba ka National Disaster Response Fund (NDRF).
Ka jylla Meghalaya kadei kawei napdeng ki 5 tylli ki jylla kaban ioh shuh shuh iaka jingiarap tyngka lyngba ka NDRF hadien ba la ioh iaka jingmynjur namar ba ka jylla kala shah ktah naka jingshlei um, ka jingtwa khyndew bad kajingther u lapbah lapsan ha u snem 2022.
Ka High Level Committee hapoh ka jingialam jong u Myntri ka SorkarPdeng uba khmih iaka Kam Pohiing u Amit Shah kala ai iaka jingmynjur ban pyllait sa T1,816.162 Klur sha ki 5 tylli ki jylla.
Kane ka pyni ba ka sorkar pdeng hapoh ka jingialam u Myntri Rangbahduh ka ri u Narendra Modi ka kwah ban iarap ia ki paidbah jong ki 5 tylli ki jylla kiba la mad iakijingeh kiba khraw naka jingwan lynshop ki bor maraiang.
Ka jylla Assam kan iohpdiang T.520.466 Klur, ka Himachal Pradesh kan ioh T.239.31 Klur, ka jylla Karnataka kan ioh T.941.04 Klur bad ka jylla Nagaland kan ioh 68.02 Klur.
Katei ka jingbhah tyngka shuh shuh ka long kham bun shah ia ka jingiarap tyngka jong ka sorkar pdeng iaki sorkar jylla ha ka State Disaster Response Fund (SDRF) bad ha ka mang tyngka jong u snem 2022-23, ka sorkar pdeng kala pyllait T.15,770.40 Klur sha ki 25 tylli ki jylla ha ka SDRF bad T.502.744 Klur sha ki 5 tylli ki jylla na ka NDRF.
Haba kala don ka jingjia jongka jingwan lynshop ki bor mariang, ka sorkar pdeng kala phah ia ki kynhun Inter-Ministerial Central Teams (IMCT) sha ki jylla kiba la mad iaka lanot khlem da ap ban ioh pdiang iaknao kano ka kaiphod na ki sorkar jylla.
