Shillong, Risaw 12 : Kum ka jingpynkut noh ia ki jingiakynad bala iaid da ki snem ha ka kam kamai kali ban kit ia ki nong jngohkai pyrthei, ka Sorkar Jylla ha ka sngi Nyngkong kala rai ban tei ia ka Transit Hub ka juk mynta ha Umtyrngar bad ban thaw ia ka Committee jong ki kynhun ba don bynta ha ka kam, ka ban pynthikna ba ki local tourist taxi kin ioh kamai bha na ki hotel bad ki homestay.
Hadien ba pyniaid ia ka jingialang bad ki kynhun kiba trei ia ki kam ba don jingiadei bad ka kam jngohkai, u Symbud Myntri Rangbah ba khmih ia ka Tnad Transport Bah Sniawbhalang Dhar ula ong ba ka Tnad Transport kan pynroi ia ka jaka ha Umtyngar ban pynlong kum ka jaka treikam.
Ha kane ka jingialang la wan iashimbynta da ki seng jong ki Tourist Taxi, ki Nongpyniaid Hotel bad ki Seng jong ki Homestay,ki Tour Guides, bad ki Heh Ophisar ka Tnad Tourism, Deputy Commissioner bad Superintendent of Police ka East Khasi Hills.
“Mynta ngi sngi ngi la iashong ia ka jingialang kaba kongsan, kaba seisoh bad kaba tei bha. Ngi la iakren halor ki jingeh ba iadei bad ki kam jngohkai kiba la don mynta la katto katne snem” ong u Bah Sniawbha.
“Ngi la iohpdiang ia ka jingkyrpad na ka seng ki tourist taxi, kumta ngi la rai ba ngin buh ia ka jaka pynieng kali kaba paka ha ryngkat ki jingdonkam baroh ha ka thain Umtyngar lem bad ka food court, cage, painkhana. Kan long kum kawei ka jaka jngohkai ha ka dur jong ka jingpynhiar bad jingkyntiew ia ki nongjngohkai. Ngi la ai ka jingmynjur” ula ong.
U Bah Sniawbha ula ong ba ka Sorkar kan sdang ban pyntrei nyngkong ia ka Umtyngar Project hashuwa ban pyniar sha kiwei pat ki jaka.
Ka jaka, u ong, la tyrwa da ka Shnong khlem kano kano ka jingsiew bad yn pynroi ia ka da ka Tnad Transport.
Ha kawei pat ka rai kaba heh, u Bah Sniawbha ula kyntu ia ki hotel bad ki homestay ban aikamai hakhmat eh ia ki local taxi.
“Kila thaw ia ka committee- ka committee ba nyngkong bad ki seng ki tourist na ki hotel, homestay bad ki tour guides. Kin sa pynbeit ha kata ka rukom ba lada wan ki nongjngohkai, kin ialehkai kat kaba lah ban pyndonkam nyngkong eh ia ki local taxi jong ngi” ula ong.
Haba pynpaw ba ka kam jngohkai pyrthei ka la sdang biang ban kiew, u Dhar u la ong, “Ha kine ki sngi ba la dep, ka kam jngohkai ka la sdang ban duna khyndiat, hynrei mynta ka la sdang biang ban kiew kumba mynshuwa. Nga ngeit ba kane ka jingïalang kaba la long mynta ka sngi kan ai mynsiem bad pynkhlaiñ biang ïa ka kam jngohkai pyrthei.”
“Ka Sorkar ka la wanrah ïa kiba bun ki skhim ha ka liang ka kam jngohkai pyrthei, bad shisha kine kin pynkhlaiñ ïa kane ka kam, hynrei kam dei kaei kaei kaba lah ban jia tang shi miet,” u la bynrap, haba pynpaw ba ki nongïashim bynta ki la sngewtynnad ïa kane ka jingïakren kaba la long nyngkong eh ha kane ka rukom.
Ha kaba ïadei bad ki lad jingïada bad jingshngaiñ, u Dhar u la ong ba ki pulit kin pynlong ïa ka jingpeitngor ba 24 kynta ha ka shi sngi bad hynñiew sngi ha ka shi taïew (24×7), ha shilynter ka Sohra circuit. Yn pyndait ruh ïa ki kor CCTV ha ki jaka ba kongsan, kynthup ha ki homestay.
