Shillong, Risaw 12: U Symbud Myntri Rangbah ka Jylla Bah Sniawbhalang Dhar u la kam ba ka jingiakhih jong ka Cockroach Janata Party (CJP) kan nym ktah ia ki samla ka Meghalaya haba ong ba ka dei ka mat ka Sorkar Pdeng kaban sa pynpeit hi da ka Sorkar Pdeng.
“Ym lei lei, namar kane ka dei ka mat ka Sorkar Pdeng. Nga tharai ba ka Sorkar Pdeng kan pynbeit bha ia kane” ong u Bah Sniawbhalang haba la kylli ia ka jingktah kaba lah ban mih na ka jingiakhih jong ka CJP.
Halor ka jingdawa ban weng noh ia u Chief Election Commissioner, u Bah Sniawbhalang um shym la kwah ban kynthoh eiei.
“Peit, ka jingdawa ne kaei kaei, nga tharai ba ka Sorkar India kan dei kaba biang tam ban jubab. Balei ngan jubab nga na ka bynta ka Sorkar Pdeng” u la ong.
Haba kylli hato ki nongthep vote ba dang samla ka Jylla kin shah khring ban rung sha ka CJP, u Bah Sniawbhalang u la ong ba ka sorkar ka ieng skhem bad ki samla bad pynpaw ia ka jingshaniah ha ka jingbishar jong ki.
“Ngam tieng iaki ki samla ka Jylla. Nga ju ieid bad burom ia ki samla ka Meghalaya namar ki samla Meghalaya jong ngi ki long kiba stad bha bad ki tip ia kaei kaba ki dei ban leh hadien habud, namar kum ka sorkar ngi don ryngkat bad ki,” u la bynrap.
