Shillong, Jymmang 17: Ka Sorkar jylla kala ai jingmynjur ia ka Tender Committee kaba thymmai na ka bynta ban aiti pyniaid ia ka 108 Emergency Services sha ka kompani kaba thymmai.
Haba iakren bad ki nongpathai khubor, ka Myntri ka Koit ka Khiah Kong Ampareen Lyngdoh kala ong, “Mynta ka sngi nga la ai jingmynjur ia ka Tender Committee kaba thymmai bad mynta ka kynti ngi dei ban leh haka rukom kaba dei ia ka kam”.
Kala ong, ba ka long kaei kaei ka bym itynnad ba ia ka Tender kaba la khot ban pyniaid thymmai ia ka 108 Emergency Services kam shym la long kaba la iaid beit ha u snem ba la dep.
Ka Kong Ampareen kala ong “Ia mynta ka NHM ka dang pyniaid ia ka 108 Emergency. Ki nongtrei ki don iaka jinghun hynrei kaba sngewsih ka long ba ka NHM kam dei pat ka kynhun kaba dei ban pyniaid ia ka 108 Emergency Services.”
Kala pynpaw ia ka jingsngewkhia ha kaba iadei bad ka hok jong ki nongtrei, kala ong dang shen, kila don ar tylli ki jingjia ha kaba ki nongtrei jong ngi kilamad iaka jingjia aksiden kaba shyrkhei bad uwei na pdeng jongki ula kylla noh uba don ka jingdkoh ha ka dkhot met.
“Ym shim la ioh ia kano kano ka jingmyntoi, ne ka jingiarap ha ka por ba u dang don ha ka kam, ym don Insurance, kumta kane kam lah ban iaid beit kumne. Nga sngew synei bha ia u nongtreu. Ha ka jingshisha ngidang ia pyrkhat bha ia kaei kaba ngi dei ban leh na ka bynta kitei ki nongtrei, kiba mynta kim lah shuh ban wanphai ban trei biang ia ka kam.
Lada dei ba ka don ka kompani kaba pyniaid ia ka EMRI Services, kitei ki nongtrei kila dei ban ioh ia ki jingmyntoi” ong ka Kong Ampareen bad ka bynrap bad ka pynthikna ba ka dang iatrei bad ka sorkar jylla ban peit ia kaei kaba bha tam kaba lah ban leh ia kitei ki riewshimet.
“La pynkheiñ ia ka hok jong ki nongtrei namar ba ym shim la pyntreikam pura, kam shym la don ka kynhun kaba la pynkupbor ban pyniaid ia ka 108 Services” kala ong.
