Shillong, Nailur 30 : Ka Sorkar Jylla kala ai jingmynjur ia ka song pisa ban kyrshan ia ka Garo Hills Autonomous District Council (GHADC) ba kan siew pynkhuid ia ki tulop ba sahteng bad ban pynthikna noh ia ka jingsiew tulop ha ka por ka ba biang shala ki jongki nongtrei.
Hadien ka pyniaid ia ka jingialang Kynhun Myntri ha ka sngi Ba-ar, u Myntri Rangbah Conrad K Sangma ula pynbna ba ka Sorkar Jylla kan pyllait ia ka advance ba kumba T.50 klur sha ka GHADC, ba kynthup ia T.24-25 klur na ka bhah khajna jong kane ka Council bad sa T.25 klur ban siew ia ka tulop ba 12 bnai ba sah bad ka jingsiew tulop naduh ka 1 tarik Naiwieng.
Ia kane ka rai la shim haba pynshong nongrim ia ki jingai jingmut jong ka Committee bala thung hapoh ka Tnad District Council Affairs, hadien ba ka sub-committee kala pynlong ia ka jingaikren bad ka GHADC bad aiti ia ka kaiphod dang shen.
“Hadien ki jingiakren kiba bniah bad ka sub-committee bad ka jingiakren kaba bniah bad ka EC jong ka GHADC bad ruh ka jingsngewthuh ia ki jingdonkam jong ki bad ki jingeh ba ki iakynduh, ka Sorkar bad ka Kynhun Myntri mynta ka sngi kala rai ban pyllait ia ka advance ka bhah jong ka Council bad ka khajna bad da kane, kin sa lah ban siew noh ia ka tulop ba 12 bnai ba sahteng bad kin lah ruh ban siew noh ha ka por kaba biang ia ka tulop naduh u Naiwieng” ong u Conrad haba iakren bad ki nongthoh khubor.
“Kumba T.24-25 klur kaba ngi don kum ka bhah khajna jong ki ka don bad ka Sorkar Jylla. Kane ka dei ka bhah ba ki dei ban ioh ia kaba ngin sa pyllait noh sha ki. Sa kawei ka advance ba T.25 klur yn donkam ban siew ia ka tulop jong ki 12 bnai ba sahteng bad ruh ban siew ia ka tulop ha ka 1 tarik Naiwieng” ula ong haba bynrap ba ka Sorkar Jylla kan sa pyllait ia ka song pisa sha ka GHADC ESCROW account ban pynthikna ba ia kane ka pisa la pyndonkam tang ban siew tulop.
U Myntri Rangbah ula pynshai ruh “Kumba nga ong ba kane kam dei satia ka jingiarap lane kano kano ka jingtuklar, kam pat shym la don eiei ba rai mynta ka sngi. Tang kawei ba ngi rai ka long ba ngi la pyllait ia ka advance jong ka bhah khajna ia kaba ki dei hok ban ioh” .
U Myntri Rangbah ula pyntip ruh ba ka GHADC kala mynjur ban pdiang ia ka jingthung ia u Ophisar IAS kum u Principal Secretary, da ka jingtyrwa ban pynlong ia u Deputy Commissioner kum u ex-officio Principal Secretary.
Kiba bun ki nongtrei ka GHADC kiba don hapdeng 1200-1300 ngut kila soi ia ki kot ki sla ba ki pdiang ia ka song pisa, ia kaba haduh 800 ngut kila aiti ruh da ka jingthoh.
Nalor kane, u Myntri Rangbah ula pyntip ba ka Sorkar Jylla kala ai jingkyrshan ia ka GHADC da kaba pyllait ia ka song pisa bad nang ai pisa shuh shuh ha kine ki lai snem bala leit noh.
“Ka rai mynta kam dei satia kaba ngi leh tang mynta hynrei wat ki snem bala leit noh ruh, ngi la pyllait song pisa sha ka GHADC ba kan lah ban siew ia ka tulop. Ha ka jingshisha ha kine ki saw snem shiteng, kumba 42 bnai ka tulop la lah ban siew bad kaba bun ka pisa ka la mih namar ba ngi pyllait shuh shuh ia ka pisa kum ka jingai advance sha ki” ula bynrap.
 ba kan siew pynkhuid ia ki tulop ba sahteng bad ban pynthikna noh ia ka jingsiew tulop ha ka por ka ba biang shala ki jongki nongtrei.){kind=link}