Mynjur ka Sorkar ban pynkylla noh ia ka Office Memorandum ka Roster System u snem 2022

Yn pyniaid noh shakhmat ia ka jingthungkam hadien ka OM thymmai

Shillong, Jylliew 06: Ka Sorkar Jylla hynne ka sngi Ba-ar kala mynjur ban pynkylla thymmai (Amendment) ia ka Office Memorandum (OM) u snem 2022, kaba dei jong ka Reservation Roster haba pyntip ruh ba ka kam thungkam thungjam kan sa sdang noh hadien ka jingpynkylla ia ka OM.

Ia kane la pyntip da u Myntri Rangbah ka Jylla Conrad K Sangma hadien ka jingialang jong ka Kynhun Myntri, uba la pyntip ruh ba iaki jingai jingmut jong baroh ki Seng Sain Pyrthei la pynrung lang ha ka jingpynkylla ia ka Office Memorandum bala pynmih ha u bnai Jymmang 2022.

Hynrei ula ong “ Ka long kaba eh ia u ban batai ia baroh ki jingtip kiba iadei bad ka jingpynkylla thymmai ia ka OM”.

U Myntri Rangbah ula pyntip ba ia kane ka jingpynkylla yn sa pyndep lehse lashai ka sngi ne la shisngi kaba mut ruh ba hadien kane, kan sa sdang noh ka kam iathungkam thungkam hapoh ka Jylla.

“Da kine ki jingpynkylla ha ka OM, ka kam ba iadei bad ka jingthungkam thungkam ruh kan sa sdang noh hadien bala pynmih ia ka OM ba thymmai, kaba lah ban long lashai ka sngi ne lashisngi” ong u Myntri Rangbah.

Lah ban kdew hangne ba ka Voice of the People Party (VPP) kala dawa ia ka Sorkar Jylla ban pynsangeh shuwa ia baroh ki jingthungkam thungjam ha ki tnad Sorkar tad haduh ban da dep iatai halor ka Roster System bad ka jingbishar thymmai ia ka Job Reservation Policy.
Halor kane u Myntri Rangbah ula ong “Ngim lah ban pynsangeh ia ka jingthungkam thungjam namar kan sa ktah ia ka rta jong ki samla kiba wad kam ha ki kam Sorkar”.

“Ka jingthungkam kam dei ban sangeh, nga mut ba ngim lah ban pynsangeh ia ka jingthungkam namar bun na ki samla jong ngi kiba dei ban ioh kam bad kiba mut ban applai kam, kin sa kut noh ka rta applai kam. Lada ngi pynslem, kin don bun kiban shah ktah bad kumta ka jingthungkam ka dei ban iaid na ka bynta ka bha ka miat ki samla ba kin iohkam katba ka jingiatai bad jingshong bishar jong ki Committee ka dang iaid halor ka Reservation Policy” ong u Conrad.

Haba kylli la ka Reservation Roster kan treikam naduh ba sdang treikam ka Reservation Policy ne kan long nangne shakhmat, u Myntri Rangbah ula pynshai ba ka Roster ka dei ka kam ba iai bteng bad ka long kaba donkam ban tip hangno ngi don ha ka roster mynta.

U Myntri Rangbah ula ong “Nga la kren naduh ka sngi ba nyngkong, ba ka Roster ka dei ka kam ba iai bteng, hooid, ka sdang naduh u snem 1972. Hynrei ka jingiaibteng ka don hangtei. Ngi la dep kren ruh ba ha kiba bun ki snem bala leit noh, ki don bun ki kam kiba la dep ban pyndap da ki katto katne ki jaidbynriew, don kiba pyndap da kiwei pat ki Jaidbynriew ha ka bhah jong kiwei”.

“Hynrei, lada long kumno kumno ruh, kine ki kam ki dei kiba la dep thungbriew hynrei ka jingpynbeit ia ki jingkhein jingdiah (data) jong ka Roster ka long kaba donkam khnang ba ngin lah ban tip hangno ngi don ha ka Roster mynta bad ha ka serial nombor aiu ba ngin sdang ” ong u Conrad.

“Kane ka dei ka jingthmu ba hakhmat eh bad hadien kane, kan sa mih ka jingpynbna paidbah ia ka jinglait kam na kane ka serial nombor bad kane ka dei ka jingthmu ban pynbeit ia u nombor naduh u snem 1972 bad kano kano ka jingkhein jingdiah (data) kaba ngi ioh, ngin sa sdang nangta bad ia kiba ngim ioh, ngin sa sdang naduh 1”.