Shillong, Lber 26: Ka Kynhun Myntri ka Sorkar Jylla hynne ka sngi Balang, kala ai jingmynjur ia ka jingtyrwa ban kyntiew noh ar shah ia ka shuti ‘Casual Leave’ ia ki nongtrei sorkar sha ka 30 sngi.
Haba iakren bad ki nongthoh khubor, u Myntri ka Sorkar Jylla u Bah Paul Lyngdoh ula ong, ba kala don lypa ka jingpynbeit bad ka Circular, ia kaba la lap ba kala long kaba la rim bha bad ia ki sngi kiba la shah ban shim shuti ki nongtrei sorkar lyngba ka Special Casual Leave ka long tang 15 sngi ha ka shi snem.
“Ngi lah rai mynta, ba ki sngi ban ai ia ka shuti kan kiew ar shah noh sha ka 30 sngi” ula ong.
“Kaba kham kongsan ia ka jingdonkam ban ailad ia ki nongtrei sorkar, kiba iashimbynta ha ki jingiakob ialehkai bad ha ki Athletic Meet bad haba ki don kum kitei ki jait jingiakob, ki jingialehkai ki bapher bapher ki donkam ruh ia ka jingiashimbynta jong ki nongtrei sorkar ka long kaba donkam bad ia katei ka por yn shim ba kadei ka por ba ki nongtrei sorkar ki leit ban pyndep ia ka kamram ka jongki bad yn ym khein ba ki shim shuti” la ong u Bah Paul Lyngdoh.
Katkum ka jingong ka jongu, katei kan iarap ia ka jylla ha kaban pynbiang ia baroh ki jingdonkam khamtam eh da kaba phaikhmat sha ka National Games kaban sa long.
