Shillong, Jymmang 05 : Ka Shillong Lajong FC bad ka Janepih YSCA ki la pynskhem ialade kum ki kynhun kiba bat ia ki kyrdan ba nyngkong ha ka Group E bad G, kaba la wan hadien ka jinglah ban khur ia ki nam jop ha ka lympung Meghalaya State League ba la long hynne ka sngi Ba-ar.
Ka Shillong Lajong ka la pynliem da 3-0 ia ka Lamyrsiang SCC ha ka jingiakhun ka Group E ba la long ha Wahiajer, katba ka Janepih ka la pynliem ia ka A’chik SCO Rongjeng da 4-1 ha ka jingiakhun ka Group G ba la long ha Williamnagar.
Ha kawei pat ka khubor jong kane ka lympung, ka kynhun ialehkai ka Mawphu ka la pyntikna ialade ban jam sha ka pre quarterfinal hadien ka jinglah ba kan iakhaid da mar shi kol bad ka Mawlum Tyrsad SCC, ha ka jingiakhun ka Group B ba la long ha madan ka MFA Ground, Polo.
Haba phai sha ka jingiakhun jong ka Group C ka kynhun ialehkai jong ka Laskeiñ S&CSC ka la pynliem noh ia ka Lamin XI SCC da 5-3, ha ka jingiakhun ka Group C kaba la long ha Amlarem.
Da kane ka jingjop, ka Laskeiñ ka la don ha ka kyrdan kaba ar, ia kaba kan hap bakan ap pat ia ka result kaban mih na ka jingiakhun ka ban long lashai ka sngi hapdeng ka Amlarem SC bad ka Mawlai SC.
Katba ka jingiakhun hapoh Mairang, ka kynhun Umlakro ka la lah ban pynliem ia ka Lawbah SC da 5-2, ha ka jingiakhun kaba dei jong ka Group F.
Katba ha ka jingiakhun ka Group A, ka Mawshun kala kiew sha ka kyrdan kaba lai hadien ka jinglah ban pynliem ia ka Umkaber SCC da 6-1, ha ka jingiakhun kaba la long ha SSA Stadium, Polo, Shillong.
Katba artylli kiwei pat ki result jong kane ka lympung iakhun ba long hynne ka sngi ki la kut noh ha ka jingiakhaid, kaba nyngkong ka dei na ka jingiakhun ka Group D ba la long ha Khliehriat ha kaba ka jingiakhun hapdeng ka Ladthadlaboh SC pyrshah ia ka Thangskai Tiger SC ka la kut noh ha ka jingiakhaid kaba long da mar ar kol.
Ha ka Group H ka jingiakhun hapdeng ka Seng Samla Umdang Pyllun pyrshah ia ka Mawlarshong SC ka la kut ha ka jingiakhaid kaba long da mar ar kol.
Lashai ka sngi ki jingiakhun ki long:
Group A (Shillong SSA Stadium) – Khimusniang SC vs Nongkseh SSCC
Group B (Shillong MFA Ground) – Mulang SC Nongbah vs Nangkiew Irat SC
Group C (Amlarem) – Amlarem SC vs Mawlai SC
Group D (Khliehriat) – Rymbai Shkenshynriah SC vs Jalaphet Moochut Pyrdung SC
Group E (Wahiajer) – No match scheduled
Group F (Mairang) – Mishon SSCC vs Langsning FC
Group G (Williamnagar) – Attong Matgrik FC vs Maram FC
Group H (Mawkyrwat) – Mawten SC vs Rangdajied United FC
