Shillong, Risaw 12 : U Myntri Rangbah ka Jylla Conrad K Sangma ha ka sngi Nyngkong, ula buh ia u mawnongrim ban tei ia ka Mini Secretariat ha Patharkhmah bad pyntip ba ka Sorkar Jylla kala kynshew haduh T.1,847.38 klur ka pisa na ka bynta ki project bapher bapher ban pynroi ia ka Ri-Bhoi khamtam ha Western Ri-Bhoi.
Ia une u mawnongrim la buh ha ka jingialang ha Western Ri-Bhoi Football Ground, Patharkhmah ha ka jingiadonlang u MLA bad Myntri Sorkar Bah Sosthenes Sohtun.
Ha kane ka sngi la plie ruh ia ka Ophis thymmai ka Jirang Block da ka nongialehkai phutbol ba pawnam ka Jirang ka Ribansi Jamu bad kumjuh ruh la plie ia ka Building ba thymmai ka Patharkhmah Senior Secondary School bad ka Patharkhmah Model Degree College.
Ka Jirang C&RD Block ka dei kaba la pynkha ha ka 24 tarik Lber 2001 bad ka headquarter ka don ha Patharkhmah. Ia u mawnongrim nong ka Block Integrated Development Complex ba tymmai la buh ha ka 27 tarik Risaw 2023 kaba ai sha ki Ophisar ka Block ia ka jingtreikam kaba paka.
Ka Sorkar kala kynshew pisa ban shna pynbha ia ki Block Office ha kylleng ka Ri-Bhoi. Ka Block Development Integrated Complex ha Mawhati C&RD Block la dep ban mynjur ha ka mang tyngka ba T.4.50 klur.
La pyntip ruh ba ka Sorkar kala pyntrei haduh 184 tylli ki project ba shongdor palat T. 1 klur kawei, kiba la mang pynlut baroh lang haduh T.1,847.38 klur ha kylleng ka Ri-Bhoi bad napdeng kine, 14 tylli ki dei kiba la dep ban pyntrei, 109 tylli kiba dang pyntrei bad 61 tylli kiba dang sdang.
Bun na kine ki project ki dei kiba ha Western Ri-Bhoi ba kynthup ia ka jingkieng steel ba T.16.58 klur ha ka surok Patharkhmah, ka surok sha Patharkhmah Model Degree College ba T.3.51 klur bad ka Jirang Primary Health Centre ba T.1.26 klur.
Haba kren ha ka jingialang, u Conrad ula pynpaw “Ka long kaba sngewhun ban iohi ba ki Block Office ha kylleng ka Jylla kiba ju treikam na ki iingwai bad ki jingtei bala rim, kila ioh ia ki Ophis thymmai bad bap aka” ula ong.
Ula ong ba ka jingbuh mawnongrim na ka bynta ka Mini Secretariat ha Patharkhmah ka iai ban ia ka jingkut jingmut jong ka Sorkar ia ka synshar khadar ka juk bad kaba kloi ban iarap ia ki paidbah. “Ka Mini Secretariat kaba la buh mawnongrim mynta ka sngi kan wanrah lang ha kawei ka phyllaw ia ki Ophis jong ka Patharkhmah Civil Sub-Division khnang ba ki nong shongshnong kin lah ban pyndep ia ki kam jong kawei pa kawei ka Ophis tang ha ka shisien wan ha ka jaka ban leit na kawei ka jaka sha kawei pat” ong u Myntri Rangbah.
“Ki paidbah kim dei ban hap iaid da ki kynta kynta lane da ki sngi ban ioh ia ka jingshakri jong ka Sorkar bad ka bor synshar ka dei ban wan shajan jong u paidbah” ula ong haba kyntu ia ki Ophisar ba kin ai ka jingshakri da ka jingsngewrit bad ka jingisynei. Ula kyntu ruh ia ki kynhun ba shakri ia ka imlang sahlang ba kin iadon bynta lang ha ki kam ban wanrah ia ka roi ka par.
Ka Patharkhmah Model Degree Committee ka dei ka degree college ba nyngkong eh jong ka Sorkar ha Ri-Bhoi, kaba la seng ha ka 25 tarik Jymmang 2022 hapoh ka Rashtriya Uchchatar Shiksha Abhiyan (RUSA), bad ia ka campus la plie paidbah hynne ka sngi.
Haduh mynta, bun ki samla pule ka Western Ri-Bhoi kiba pyndep ia ka klas XII ki hap ban leit sha Nongpoh, Shillong lane Guwahati ban ioh degree bad bun ki longiing kim lah ban kyrshan ia ka jinglut ha ka leit ka wan, ka baiwai iing bad ka bam ka ding.
Kane ka College ka ieng ha ka jaka ba 10.09 acre hapoh ka Jirang C&RD Block bad ka dei kaba la pyniasoh ialade sha ka Captain Williamson Sangma State University bad ka tyrwa ia ki undergraduate course ha ka Arts.
