Aizawl, Jylliew 30: Ka nongbah Aizawl jong ka jylla Mizoram, kala long kaba la khreh ban ioh ia ka lynti rel ba nyngkong eh hadien ba la lah ban pyndep ia ka lynti rel ba jngai 51.km na Bairabi-Sairang.
La khmih lynti ba u Myntri Rangbah duh ka ri India, u Narendra Modi un plie paidbah ia kane ka jingpyniasoh lynti rel jong ka Aizawl ha kine ki sngi ban wan.
U wei na ki heh ophisar u la ong, “Ka Northeast Frontier Railway ka la trei shitom shisha ban pynurlong ban trei kam ka lynti rel ka ban pyniasoh bad ka nongbah Aizawl sha kiwei pat ki network jong ka Indian railway bad kumjuh ruh sha kiwei ki bynta jong ka ri”.
Na ka liang ki heh ophisar kila khmih lynti ba ka Bairabi-Sairang railway project yn lah ban ai nam sha ki paidbah jong ka ri ha u bnaiNaitung, katkum ka jingangnud bad ka jingkhmih lynti u Modi ban pyntikna ban pyniasoh ki rel sha ki dong ki thain kiba ym pat don ia ka railway.
Wat lada shibun ki jingeh ba ia kynduh namar ka jinglong jingman jong ki jaka, hynrei la lah pat ban pyniasoh ia ka lynti rel sha Aizawl bad kumjuh ruh ban dang pynheh bad pyniar shuh shuh ia ki lynti rel. Kane ka project ka long ka jingpynshisha ia ka jingangnud bad ka jingthrang ka sorkar ban pynbha ia ki jingtei ha ki jylla ka thain shatei lam mihngi.
Ha kane ka lynti rel ki don haduh 48 tylli ki tunnels kiba jngai kumba 12.853 km bad 55 tylli ki jingkieng baheh bad kumb 87 tylli ki jingkieng barit bad 5 tylli ki surok overbridges bad 9 tylli ki jingkieng napoh surok.
Lah ban kdew hangne, ba kadei kawei ka jingkieng kaba don ha u number 196, kaba ieng ha ka jingjrong kaba don haduh 104 meter bad kaba kham jrong 42 metres ban ia ka Qutub Minar.
Shisien ba ka ophis u Commissioner of Railway Safety (CRS) kila ai jingbit na ka bynta ban pyntrei kam noh, un sa phah ka jingkyrpad sha ka ophis u Myntri Rangbah duh ka ri India ban plie noh ia kane ka lynti rel.
