Jowai, Jylliew 30 : Uwei u briew ula iap hashen bad u paralok ula mynsaw jur na ka jingshah tynrah kali ha surok National Highway-06 ba marjan ka Toll Gate ha Iaiong.
Kine ki arngut kiba dei ki nongbylla ha ka thain Phramer, la suba jur ba kila shah tynrah ha ka trok kaba la pynher sted bha katba ki dang iashong thuk thuk.
Kat kum ka khubor Pulit, kane ka jingjia kala jia ha ka por kumba 8:48 baje ha ka miet sngi U Blei. Ki Pulit ka thain, kila hiar pynsted sha katei ka jaka bad kila shem ia uwei u briew sharud ka surok da ka jingiarap ki nongiaid nongieng, bad mar mar la pynkit noh ia ki sha Civil Hospital Jowai ban ioh jingsumar.
Ia uwei pat la shem ba ula thiah lyngktar kumba 100 meter ha ryngkat ka thuk thuk Pulsar kaba don u nombor AS01-R-3732. Une u briew ula mynsaw jur na ka khlieh bad la pynbna iap haba poi ha hospital. Ia ka met jong u, la pynkynriah noh sha ka jaka buh metiap ban pyndep ia ki jingdonkam baroh.
Ki nongsakhi ia kane ka jingjia kila pynithuh ba une u briew ba khlad u kyrteng u Biomston Sangma ba na Dabongjora, West Garo Hils bad uba mynsaw u kyrteng u Tengsrang Sangma ba na ka shnong Trekilla, West Garo Hills.
Ki Pulit ki iathuh ba ha ka jingtohkit la lap ba kine ki arngut ki dang iamih na Iaiong da ka thuk thuk ban leit sha Phramer hynei kila shah kynrah nadien ha ka kali kaba pynher sted bha. Kane ka kali kala phet krad na kane ka jaka.
Ki Pulit kila buddien ia kane ka kali bad dang shong bishar ia ki video ba ioh rung na ka toll gate ban lap ia ka. Kila kyntu ruh ia ki paidbah ba lada ki don kano kano ka jingtip ba kin sngewbha ban iarap lem ha ka jingtohkit.
