Aizawl, Nailar 11: Ka sorkar jong ka jylla Mizoram, mynta kala sdang ban lum ia ki jingtip ba bniah ia ki nong Myanmar kiba wan ban rieh tngen hadien ka jingshimti ki shipai ha u snem 2021 bad ka jingiakynad kaba ju mih man ka por.
Kane ka jinglum jingtip ba bniah ia ki biometric ba kynthup naduh ki shympriah kti bad ki dur la sdang ha baroh 11 tylli ki district bad kumba 2,000 ngut ki nong Myanmar kila dep ban leh ia kane.
Ia kane la leh da ki bor pyniaid district hapoh ka jingpeit bniah jong ka tnad kam poh iing.
Ki seng treimon sngewbha jong ka thain bad kiwei kiwei ki seng bhalang kiba la ju ai jingiarap ia ki nongphetwir namar ka jingsngew para briew, hynrei mynta ki iarap ruh ban lum ia ki jingtip ba bniah jong ka biometric.
Palat kumba 30,000 ngut ki nong Myanmar kila ioh jaka rieh tngen ba shipor ha ki community halls lane sha ki iing jong kiba ha iing kiba ha sem.Naduh ba shimti ki bor shipai man ka por ki ju iakhun bad ki kynhun lehnoh bad ki “nongïakhih kiba kyrshan ïa ka synshar paidbah” kaba la pynbor ïa ki nong Myanmar ban phet rieh sha Mizoram, ka jylla kaba ïasam khappud bad ka Myanmar kaba 510 km.
