Imphal, K’lyngkot 20: U Myntri Rangbah ka Mizoram Lalduhoma ha ka sngi Thohdieng ula pynpaw ia ka jingkhmih lynti ba ka Sorkar Pdeng kan pynjari noh da ka President Rule ha Manipur.
Haba iakren bad ki nongthoh khubor shabar ka 71st Plenary Session jong ka North East Council (NEC) ha Shillong, ula ong “Ka jinglong jingman ha Manipur kam pat ilong satia, Kam shym la don ka lad ban pynbeit hapdeng ka Sorkar India, ka Sorkar Manipur bad ki Nongialam riewlum”.
“Kane ka dei kaba ngi khmih lynti namar ka dei ka kam kaba la slem bha. Ka jinglong jingman kam pat kylla satia bad hateng hateng kala nang sniew shuh shuh” ong u Lalduhoma.
Ula ong ba ki paidbah ka Manipur kiba, hadien ka jingjia umsnam, kila wan riehtngen ha Mizoram .
“Ka Riti Synshar ka Ri ka shah ba kin sah ha kano kano ka jaka hapoh ka Ri. Tad haduh da wan phai biang ka jingshongsuk ha Jylla Manipur, ngin khmih lem ia ki” ong u Lalduhoma.
Palat 32000 ngut ki briew na Myanmar kila wan riehtngen ha Mizoram naduh ba sdang ka jingknieh bor synshar ki shipai ha u snem 2021.
Sa 1000 ngut ki briew na Chittagong Hil tracts ka Bangladesh ruh kila wan sha Mizoram.
