Nongpoh, Nailar 21: Palat 400 tylli ki Longiing jong ka thain Tyrso kiba dei na ki 15 tylli eiei ki shnong kiba hap hapoh ka Bhoirymbong C&RD Block, ki la mih paidbah ban dawa na ki bor ka sorkar jylla ban pynioh noh mardor ia ki Rashon Card.
Kane ka sur jong kine ki Longiing kala mih na ka jingialang paidbah ba la lamkhmat da ki Self Help Group bad Village Organization jong kane ka thain, kaba la pynlong ha ka shnong Tyrso Pyllun hynnin ka sngi.
Ha kane ka jingialang paidbah la ia shimbynta da u Bah Pialshon Shadap, Rangbah Shnong Tyrso Umlyngdoh, ka Kong Sisilia Wahlang, President ka Village organization Umtngam, ka Kong Iohilut Lyngdoh nongialam ka ICPR Tyrso Cluster, ka Kong Queentina Mashli, u Bah Peter Syngkli Rangbah Shnong ka Umsamatan bad kiwei kiwei.
La sakhi ruh, ba palat spah ngut ki longkmie kiba la ia rah lang ia la ki khun rit, ki la wan ban iashimbynta ha kane ka jingialang ban pynpaw ia ki jingeh tang namar ka jingshah peit shilliang ha ki bor ka sorkar jylla ha kaba ia dei bad ka jingpynrung kyrteng ban ioh ia ki marbam bala sam da ka Sorkar Pdeng lyngba ka Sorkar Jylla.
Ka jingkynnoh kala mih ruh ba ka jingpynrung kyrteng ban ioh ration card ha ka thain ka long kaba noh tarajur namar la shem ba wat ki longiing kiba bit ba biang kila ioh ia kane ka card katba kiba duk kiba dei hok ban ioh, kila shah pynduh.
Na ka liang ki nongkren ha kane ka jingialang, ki la pynpaw ia ka jingsngewdiaw kaba khraw halor ka jingshah iehnoh ki longiing baduk kiba la palat 400 tylli ki longiing bad pynpaw ruh ba kaba kham diaw ka long, ba ka jingsam ia ki marbam bala mang da ka Sorkar Pdeng kam long satia kaba ryntih.
“Ka jingangnud jong u Myntri Rangbah duh ka Ri India u Narendra Modi ban rad dyngkhong ia ka jingduk jingrangli da kaba la pynmih ia kine ki card rashon ban iohbhah ia ki marbam mardih kumba la mang, kam shem la urlong satia ha ka thain” kila ong.
Ha kane ka jingialang, ki nongialam jong kine ki kynhun ki la jied ruh ar ngut shi shnong ban mihkhmat ha ka kynhun kaban leit ban ia kynduh ia u Deputy Commissioner ka Ri Bhoi District bad ia u Inspector ka tnad Food and Civil Supply ban dawa ia ka hok jong ki paidbah ban ioh ia kine ki rashon card bad lada kane kam urlong na ka liang ki nongshong shnong kim banse ban mih paidbah ban iakhih pat.
