Nongstoin, Nailur 04 : Ki Nongshongshnong ka Mawphanlur, hynne ka sngi Balang, kila iamih ban maramot hi ia ka surok na Markasa sha Mawphanlur- ka jaka jngohkai ba khring bha ka West Khasi Hills, namar ka jingsngap mynthi jong ka Tnad Public Works Department (PWD).
Kine ki Nongshongshnong, kila iamih ha ryngkat ki mohkhiew, ki lyngkha bad ki borsha ban maramot ia ka surok kaba la jot rathai. Kane ka surok na Markasa sha Mawphanlur ka jngai kumba 5 km eiei.
U Rangbah Shnong ka Mawphanlur haba iakren bad ka Shlem ula ong ba ka jingmih ki paidbah ban maramot hi ia ka surok ka dei namar ka jingsngew lehrain ia ka jingshah khnium ha ki nongwan jngohkai kiba wan da ka jingsngewtynnad ban pynlut por ialade bad ka mei mariang hapoh Mawphanlur.
Ula ong ba ka jingsniew jong ka surok kala ktah ruh wat ia ki trai shnong ha ka kit ka bah bad ka leit ka wan.
Ula pyntip ba namar ka jinglong jingman ka surok, ka jingwan jong ki nongshang kai sha u lum Mawphanlur, kala hiar bha ha kine ki bnai bala leit noh.
Ula kyrpad ia ki bor Sorkar khamtam ia u MLA ka thain ba un phaikhmat lem sha kane ka surok bad ban leh eiei noh na ka bynta ka bit ka biang u paid nongshongshnong bad kumjuh ruh ia ki briew kiba wankai hapoh ka thain.
.){kind=link}