Kyrshan ia ka jingdawa ki Nonghikai ban weng noh ia ka Principal ba mynta
Shillong, Nailur 07: Ka jingdawa ban weng noh ia ka Kong Aiom Ksiar Diengdoh kum ka Principal jong ka skul Pine Mount kala nang jur da ka jingmih sa ki Kmie ki Kpa jong ki Khynnah Skul ban kyrshan ia ka jingdawa ki Nonghikai, kiba la pynlong iaka jingiakhih.
Ki kmie ki kpa (ki bym kwah ban pynpaw kyrteng), kila ong, ka skul Pine Mount kala hiar ha baroh ki liang hapoh ka jingpyniaid jong ka Principal kaba mynta bad ki dap da ka jingbynniaw ba kim ju iohlad ban iakynduh iaka ban pynsngew iaka jingeh kaba ki khun ki kti ki mad bad kam ju don ruh ka jingialang hapdeng ka skul bad ki kmie ki kpa ban iatai halor kiba bun ki mat.
“Ngi dap da ka jingsngewkhia bad jingsngewsynei ia ki khun ki kti namar kim don satia iaka jaka leit shabar kaba khuid ba suba bad ha ki painkhana ha skul kam ju don ruh wat tang ka um. Ki khun haba ki wanphai sha iing na skul ki mareh beit sha painkhana namar kim ju leit shabar ha skul namar ba ka jaboh bad sma iwtung shaba palat pud hynrei lait noh tang ha ki khep ki bym banse shuh” ong ki kmie ki kpa.
Na ka liang ki khynnah skul ruh kila pynpaw ba bunsien ki kiar ban pyndonkam iaka painkhana ha skul namar ka long kaba isaidmet bad kane kala buh iaki ha ka jingeh kaba khraw.
Ki Kmie ki kpa, kila iathuh ba ha ki snem kiba la leit kila pynsngew iaka jingeh kaba ki khun ki kti ki mad khamtam haba don ki khynnah skul kila ioh iaka jingpang UTI hynrei haduh mynta ki painkhana ha ka skul Pine Mount ki jaboh bad ki sma iwtung hi kumjuh bad kala poi ruh sha u pud ba ki kmie ki kpa kila pynpep skul noh iala ki khun bad kila phah skul noh shawei pat tang namar ka jinglong jingman haka skul kam biang shuh kumba ju long ha ki por kiba la leit.
Kila ong, ym tang ba ka jingjaboh jong ka painkhana, hynrei ki khynnah ki mad iaka jingsyrtok ha ka por slap namar ka um ka poi haki lynti iaid bad kumjuh ruh ha ki kamra skul bad wat haka jaka pule Computer ruh kiba bun ki kor Computer kila sniew, ym don Wifi bad tang shu slap ka um ka poi ha ka kamra Computer bad bun ki khep ba ka skul kam ju don iaka bording elektrik bad kane kala buh haka jingeh kaba khraw ia ki khynnah ban ioh iaka jinghikai kaba paka.
Ki kmie ki kpa kila pynpaw ba ki ju siew ia ki jingsiew bapher bapher hynrei haba peit pat iaka jinglong jingman jong ka skul kala nang jot bad kam shym la don satia kano kano ka jingmaramot na ki bor pyniaid jong ka skul na ka bynta ka bha ka miat jong ki khynnah kynthei kiba pule ha ka skul sorkar.
“Ha ka por ba ngi leit siew ia ka bai skul bad kiwei kiwei ki jingsiew ka long kaba lyngngoh ba ngi hap ban siew ha ki 3 ne 4 tylli ki Account jong ka skul bad kane kala pynklumar khlieh ia ngi, namar ngim ioh ban siew beit ha kawei ka Account bad ngim lah ban sngewthuh balei ka skul ka don bun tylli ki Account bad la pyndonkam ha kano ka dur ia katei ka pisa kaba la lum na ki 2000 ngut ki khynnah skul haba ka skul kam don satia ia kano kano ka jingkylla” la ong ki kmie ki kpa.
Ki kmie ki kpa kila pypaw ruh iaka jingbynniaw ba ka Library ruh kam don shuh hynrei la pynkylla noh iaka sha ka kamra klas bad ki khynnah kim don ruh iaka jaka ialehkai namar ka madan jong ka skul la dap sa tang da u phlang uba heh bad ym shim la don satia kiba ot ia u phlang ne ban pynbha ia kane ka madan ialehkai khnang ba ki khynnah kin ioh ialehkai.
Nalor kane, kila iathuh ba wat iaka Auditorium jong ka skul ruh ym shim la pyndonkam satia haduh mynta bad kane ka jaka kala sah khongreng bad kylla long kum ka iingjah bad kala jot ruh.
Ki khynnah skul kila pynpaw ba kim iohlad bha ban iashimbynta ha kiwei pat ki bynta bad la bun snem ka skul kam ju pynlong shuh ia ka Concert ne kino kino ki prokram kiban tei iaki khynnah skul ne ia ka sap ka phong kaba ki don.
Ki kmie ki kpa kila kynnoh ba ka skul kala hiar bha namar ka jingbym kitkhia ki bor kiba dei khmih ia ki jingud jingnam jongki khynnah skul bad kila leit ruh ban ai da ka jingthoh sha ka sorkar jylla ba kan tuklar lem hynrei ki bor sorkar haduh mynta kim shym la leh eiei naka bynta ka bha ka miat jong ki khynnah skul bad ki nonghikai skul.
