Plie u CM ia ka Mawryngkneng CHC
Shillong, Nailur 07 : U Myntri Rangbah ka jylla Conrad K Sangma ha ka sngi Balang u la ong ba ka jingbun ki longkmie kiba khlad ha ka por kha khyllung ha kito ki snem shwa u 2018 ka la pynlong ia ki kum ka sorkar ban wad ia ka daw tynrai bad ban wanrah ia ka skhim MOTHER.
“Haba ngi wad ia ka daw ngi lap ba ki don bun ki daw kiba pynlong ia ki longkmie ban kynduh ia kum kitei ki jingjia ba sngewsih. Ka jingduna ki jaka kha khyllung bad ka jingbym leit ki longkmie sha ki PHC, CHC ne sha ki hospital ki dei ki dawbah kiba pynlong ia ki longkmie ban kynduh ia kum kitei ki jingjia” ong u Conrad hadien ba ladep ban plie ia ka Community Health Centre ha Mawryngkneng kaba la kyntiew kyrdan naka PHC.
“Bun ki longkmie ha ka por ba kha khun ki tlot bad duna snam bad kane ka ktah bha ia ki bad kane ka lam sha ka jingkhlad jong ki haba armet ne ha ka por ba kha khunlung,” ula bynrap.
U Myntri Rangbah ula ong ba dei ta ka daw baka sorkar MDA ka la wanrah noh da ka skhim MOTHER ka skhim kaban peit kyrpang ia ki longkmie armet, nangta ia ka bit ka biang jong ki hynrei wat na ka bynta ka pule puthi bad ban pynkupbor ruh ha ka imlang sahlang.
Inaugurated the Transit Home for Expecting Mothers under the CM’s Safe Motherhood Scheme at the vicinity of the newly inaugurated Mawryngkneng CHC,
This is our continuing effort to increase institutional deliveries & reduce Maternal Mortality Rate in Meghalaya@mansukhmandviya pic.twitter.com/pfQrpWNzjG
— Conrad Sangma (@SangmaConrad) September 7, 2022
U Myntri Rangbah ula ong “Phi iohi ia ka Transit Home kaban ai jaka sah kyrpang na ka bynta ki longkmie kiba sah jngai na ki jaka sumar ba kin wan sah lypa shwa ban dei ka por ba kin kha. Mynta ngi don baroh 180 tylli ha baroh kawei ka jylla,” u la bynrap shuh shuh.
U Myntri Rangbah u la ong ruh ba ka jingkyntiew kyrdan ia ka PHC Mawryngkneng sha ka CHC ka long ban pynkhlain shuh shuh ia ka jingshakri bad ban pynbun ia ki nongtrei ha katei ka jaka sumar khamtam naba katei ka jaka sumar ka hap ban peit bun bha ki shnong kiba don jngai bha na ki jaka sumar.
Ha kane ka sngi la donlang ruh u Symbud Myntri Rangbah, Bah Prestone Tynsong, MLA ka Mawryngkneng Bah Pyniaid nalor ki nongialam shnong, ki ophisar bad ki nongtrei ka koit ka khiah.
