Nongstoiñ, Jymmang 9: Kum shi bynta ban khring ïa ki samla ba kin lait na ki jingmlien kiba sniew, ki khun samla jong ka shnong New Nongstoiñ ki la mih madan ban seng ïa ki kam ialehkai pynhehksah ne body building kaba la tip kum ka Nongstoiñ Youth Calesthenic.
Kitei ki samla ki dei na ka kyntoid Mawlarshong jong ka shnong New Nongstoin. Namar ka jingbym don jaka ialehkai ba biang, kine ki samla ki ju pynlong ia rudwah Nondeiñ kum ka jaka ialehkai.
Ym tang ba ki ialehkai ha katei ka rud wah, hynrei ki peitngor ruh ia katei ka wah, namar don kiba leit ban leh jaboh kumjuh kiba pyrshang ban shoh dawai ia ki dohum doh wah.
Haba iakren bad u samla Aiborlang Marshillong President bad Banskhemlang Syiemlieh Secretary jong ka Nongstoiñ Youth Calesthenic, ki la pynpaw ba ki la sdang ialehkai ia katei ka jinglehkai naduh u snem 2020, ha ka por ba wan lyngshop ka khlam Corona.
“Mynta ka kynti ngin pynlong ruh ia ka jingiakop ban ialehkai ia katei ka “Calesthenic”, kaba ngi ai kyrteng ka “Street Workout Calesthenic Battle Meet Up Contest” ula pynbna.
“Ngi wer ia ki para samla jong ka thain Nongstoin ban iashim bynta ha katei ka jingialehkai khlem da donkam ban siew bai rung. Ka por kan long naduh ka 1 baje shiteng nohphai sngi haduh ka por 5 baje janmiet ha ka 13 tarik sngi saitjain mynta u bnai Jymmang 2023 bad kan don ruh ka jingai ia ki Khusnam”, ong u samla Aiborlang Marshillong.
Kitei ki khynnah samla ki la pan ia ka jingkyrshan na kino kino kiba lah ban noh synniang lem ia ka seng jong ki, ha ka ban iada ia ka jaka ialehkai jong ki kaba don harud jong ka Wah na ka jingwan syllad ka umsaw ha ka por lyiur.
Ha kajuh ka por ki la pynpaw ia ka jingkyrmen ba ha kawei ka sngi katei ka jingialehkai ruh kan long lang kum kiwei kiwei pat ki lympung.
