Shillong, Iaiong 29 : Kiei kiei kim iaid beit iaid ryntih hapoh ka sem jong ka Congress ha Meghalaya. Ka sur bynniaw kala mih hapdeng ki nongtrei ka Party bad ki nongialam namar ka rai jong ki MDC ban iatreilang bad ka National People’s Party (NPP) hapoh Khasi Hills Autonomous District Council (KHADC).
Ia mynta, ka Congress ka don satang 4 ngut ki MDC hapoh ka KHADC.
Ka khubor napoh ka sem jong ka Congress kala iathuh “ Ki Nongkitkam ka party bad ki shnat treikam jong ka, kila pynpaw ia ka jingbynniaw halor ka rai jong ki MDC ka Congress ban kyrshan ia ka Executive Committee ba ialam da ka NPP ha KHADC”.
“Ki MDC ka Congress kila ai ka jingbatai sha ki nongkitkam ka party ba ki donkam ban don ha ka EC ba ialam da ka NPP khnang ba kin iadonbynta lang ha ka kam phiah constituency bad ba ki MDC ka congress kin kham don ka sur ha ka jingiapynbeit thymmai ia ki constituency ka KHADC. Hynrei, la sngewthuh ba lada ka party kam ailad ia ki MDC ba kin leit iasoh ha ka EC ha KHADC, ki MDC na Mairang bad Mawkyrwat kin phet noh sha ka seng” ong ka khubor.
Ka khubor ka ong ruh ba ka Congress party kala shah ktah bha ha ka elekshon Lok Sabha ba dang shu dep ha Shillong parliamentary constituency namar kane ka jingiatreilang bad ka NPP ha KHADC.
Kane ka jingbynniaw kala nang jur naduh ba ka BJP kala pynsawa jam ia ka sur ban kyrshan ia ka NPP , kila ong.
Ka khubor ka iathuh ba ki nongkitkam ka party kila dawa ia ki MDC ka Congress ba kin weng noh ialade na ka EC ba ialam da ka NPP ha KHADC.
 hapoh Khasi Hills Autonomous District Council (KHADC).){kind=link}