Shillong, Nailur 29 : Ka Ribhoi District Sports Association bad ka Shillong Sports Association, kila pyndep ha ka kyrdan ba nyngkong bad ba-ar ha ka Zone C jong ka Meghalaya Youth Leagye 2024 hadien ba kut ka kylla ba khatduh jong ka round robin ha ka sngi Saitjain.
Kane ka lympung ialehkai ba dang shu mih thymmai, bala pynlong da ka Meghalaya Football Association (MFA) bad ba kyrshan da ka Tnad Sports & Youth Affairs, kala sakhi ia palat 500 tylli ki gol bala thep ha ki 144 tylli ki jingiakhun jong ka U-14 bad U-16 ha kylleng ki District ka Jylla, kaba pyni ia ka sap ialehkai ba tbit jong ki khynnah ialehkai.
Da ka jingkut ka round robin, la pynthikna mynta ia ki phra tylli ki kynhun ki ban wan sha Shillong naduh ka 5 tarik Risaw ban iakhun ia ka quarter final.
Baroh ki lai tylli kiwei pat ki zone kila pyndep iala ki jong ki jingiakhun bad ki don mar artylli ki kynhun na ka U-14 bad U-16 kiba la pynjlan ha ka zone c bad kin dang ban ialehkai. Kane ka fixture ka dei kaba donkam namar kin rai ba kano ka kynhun kan shim ia ka jaka ba nyngkong. Ka RBDSA kala tam shakhmat ia ka SSA hashuwa ka sngi Saitjain bad ka la lah ban bat ia kane ka kyrdan ba hakhlieh hadien ka jingjop ia baroh artylli ki jingiakhun.
Ha ka U-14, ka Ri-Bhoi kala pynliem ia ka Riwar Mihngi Football Association da 11-0 kol ha Umdihar Mini Stadium ha kaba u Ribanshan Kyrsian bad Meland Mawiong, kila ioh thep mar 3 kol. Ia ka Shillong, ha ka madan ialehkai ka MFA, u Adriel Branyden W Nongbet ula ioh thep hat-trick ha ka jingpynliem ia ka Sohra Sports Association da 8-0 kol.
Ka kynhun ialehkai U-16 ka Ri-Bhoi kala pynliem biang da 7-0 kol ia ka Riwar Mihngi katba ka Shillong kala pynliem ia ka Sohra da 12-1 kol ha kaba u Baniar Kharsohnoh ula ioh ban thep haduh 4 kol bad u Iaisanlang Dohling ula ioh thep 3 kol.
Ki kynhun kiba la ioh rung sha ka quarter final jong ka U-14 na ka zonr A ki dei ka Tura District Foodball Association bad ka North Garo Hills District Sports Association katba ha ka U-16 ki dei ka Williamnagar District Sports Association bad ka North Garo Hills.
Kiba la ioh rung quarter final na ki lai tyll kiwei pat ki zonr ha ka U-14 bad U-16 ki dei ka West Jaintia Hills District Sports Association bad Amlarem Block Sports Association (U-14 and U-16) na ka Zone B, Ri-Bhoi bad Shillong (U-14 and U-16) naka Zone C bad ka Nongstoin District Sports Association bad Pyndengumiong District Sports Association (U-14 and U-16) na ka Zone D.
Ka MFA kan sa pynmih ia ka fixture jong ka quarter final ha ki sngi ban dang wan.
