Shillong, Naiwieng 5: Ka Nangkiew Shaphrang Lumdiengngan kala ioh mad ia ka jingjop kaba nyngkong haka Meghalaya State League 2024 da kaba pynrem da 3-1 ia ka Mawlum Tyrsad ha ka jingiakhun ha ka Group C kaba la long hynne ka sngi Baar ha Tyrsad.
Ka Lumdiengngan kala ioh iaka jingjop lyngba ka jingthep kol u Kitboklang Sohtun ha ka 6 bad 64 minit bad u Pynkupborlang Kharbhih ula thep kol ha ka 58 minit, katba mar ia sdang ka jingiakhun haka minit kaba 4 u nongialehkai ka Mawlum Tyrsad u Banshem Khongsit ula ioh thep ia ka kol.
Ka Lumdiengngan mynta kala don ha ka kyrdan ka baar haka Group da kane ka jingjop da kaba ioh 3 point bad ka Seven United hynrei da ka jingiapher ha ka jingioh thep kol (0-2). Kine ki ar tylli ki kynhun kin iakynduh ban iakhun ha kasngi Palei kaban long syndon ka jingiakhun kaba khatduh ban ioh ia ka rai ia ka jingbat ia ka kyrdan ha ka Group.
Ha kane ka samoi ialehkai kaba mynta jong ka MSL, ar tylli ki kynhun kaba wan nyngkong bad baar na man la ki Group kin ioh rung sha ka Quarterfinals bad kumba long haduh mynta hi, dei tang ka Ladthadlaboh na ka Group C, Shillong Lajong na ka Group E bad ka Mawlai na ka Group F kiba la ioh rung sha ka Quarterfinal.
Kila don ruh ki kynhun kiba dang iakhun ban iaknieh iaka kyrdan kaba nyngkong bad baar ha ki Group bapher bapher.
Lashai ka sngi Balang, kin don 4 tylli ki jingialehkai bad kitei kin dei ki jingiakhun kiba khatduh ha ki Group. Kan don ruh ka jingiakhun kaba khatduh ha Tura hapdeng ka Pinggera Do•gisik pyrshah ia ka Chipakkore ha ka por 5:30 janmiet ha PA Sangma Stadium. Ka Chipakkore (4 point) ka don ia ka kabu ban long ka lahduh ha ka Group A lada ka jop ia ka Pinggera Do•gisik kaba don 3 point, hynrei kumba long mynta ka Lumsohkhlur kala wan nyngkong da ka jingioh 6 point.
Ha ka Group B, kila don 2 tylli ki kynhun kiba la ioh mar 6 point, ka Khliehmawlieh bad Sutnga hynrei kala don pat ka jingiapher halor ka jingthep kol (+6 to +1), hynrei lada ka Mawten kaba don 3 point ka jop pyrshah ia ka Riangdo Youth kumta kin don 3 tylli ki kynhun kiban don mar katjuh iaka point ban iaknieh iaka kyrdan kaba nyngkong ha ka Group.
Ha Khliehriat, ka Rymbai Skhenshynriah ka donakm ban jop da 6 kol pyrshah ia ka Mulait United ban ioh ban tam ia ka Rangdajied United kaba don ha ka kyrdan kaba nyngkong ha ka Group D.
Ha ka jingiakhun hapdeng ka Rangdajied bad Rymbai Skhenshynriah kila iakhaid da 0-0 bad ka RUFC mynta kala ioh 7 point bad ka jingheh ha ka jingioh thep kol (+100 katba ka Rymbai Skhenshynriah kala ioh 4 point bad ka jingioh thep kol ka long +5.
Ha nongbah Shillong, ka Pynursla United kan iakhun pyrshah ia ka Seng Samla Mawmluh bad kine kin iakhun ban iaknieh ban wan baar ha ka Group watla ka jingioh thep kol ka jongki ka long kaba duna bha ia kaba kan buh ha ka jingeh ia ki ban ioh rung sha ka Quarterfinal wat lada ki jop ruh.
Ki jingiakhun ha ka sngi Balang:
Group A (Tura): Pinggera Do•gisik vs Chipakkore, 5:30pm
Group B (Mawkyrwat): Riango Youth vs Mawten, 2pm
Group D (Khliehriat): Mulait United vs Rymbai Skhenshynriah, 2pm
Group F (Shillong): Pynursla United vs Seng Samla Mawmluh, 2pm
