Shillong, K’lyngkot 16: Ha ka jingiakhun ba pyni ia ka jingtbit, ki nongjngi ka Nongbah Shillong ba mihkhmat ia ka East Khasi Hills, kila khur haduh 9 tylli ki takma ksiar naka 9 tylli haba ioh ruh haduh 6 tylli ki takma rupa.
Ka jingiakop jngi jong ka Meghalaya Games 2024 kala sdang hynne ka sngi ha Rongkhon Swimming Centre.
Nalor kane, baroh 10 tylli ki takma rynnong ki dei kiba la ioh khur da ka Shillong (EKH).
Kawei ka takma ksiar kaba la duh da ka EKH ka dei kaba leit sha ka South West Khasi Hills, kaba la ioh ruh ban khur haduh 3 tylli ki takma rupa.
Women’s Wrestling:
Ka jingiakop ialympat jong ki Kynthei kala long hynne ka janmiet ha St Mary’s HS School ground bad la sakhi ba baroh ki takma kila leit sha ka EKH. Ha kane ka jingiakop ym shym la don takma rynnong.
Taekwondo Poomsae:
Ka WGH kala lehbha ha ka jingialehkai Taekwondo (Poomsae) bad ioh khur 2 tylli ki takma ksiar, kawei ka rupa bad ka rynnong ha baroh lai tylli ki category. Kawei pat ka takma ksiar kala leit sha ka WJH kaba la ioh ruh ia kawei ka rupa bad ka rynnong. Ka Ri-Bhoi kala ioh ia kawei ka takma rupa bad 2 tylli ki rynnong katba ka EKH kala ioh 3 tylli ki takma rynnong.
