Guwahati, K’Lyngkot 18 : U Nongialam ka Congress Rahul Gandhu ula pynrem jur ia u Myntri Rangbah Duh ka Ri Narendra Modi, halor ka jingleh bym patiaw ia ka kam umsnam ha Manipur kaba iasyriem kum ka thma pohiing.
U Gandhi ula kren ia kane ha ka jingialang ha Sivasagar, Assam hynne ka sngi Palei kum shibynta jong ka Bharat Jodo Nyay Yatra.
“Ngi la bynrap ia ka kyntien ‘Nyay’ ha kane ka kyrteng jong ka Yatra namar ngi ngeit ba ka BJP-RSS kala leh bym hok ha man ki Jylla. Kala don ka thma ba iasyriem kum ka thma pohiing ha Manipur hynrei u PM haduh mynta um pat leh iuhkjat satia ha kane ka Jylla”.
Lah ban kdew ba ka Bharat Jodo Nyay Yatra kala sdang biang na Sivasagar, Assam ha ka sngi kaba san jong ka jingiaid lynti jong ka. Kane ka Yatra kala iaid kumba 1.5 km tang hapoh Nagaland bad poi ha khappud Assam hynne ka step por 9:30 baje.
U MP ka Congress na Assam Gaurav Gagoi ula ban jur halor ki jingktah jong ka Yatra ia ki paidbah ka Assam bad ong “Ki paidbah hangne kila bitar namar ka Sorkar hangne kam dei ka Sorkar uba duk ba suk bad u nongrep hynrei jong ki mafia dewiong bad maw”.
Ia kane ka Bharat Jodo Nyay Yatra la pynsdang da ka Congress na ka Jylla Manipur kaba don hapdeng ka thma iapher Jaidbynriew.
