Imphal, Jylliew 06: Ki bor pahara lem bad ki paidbhur kila pynpra ia ki ktem jong ki kaikhlaw Kuki hadien ka jingkhynra kaba jur bala pynlong ha kylleng ki jaka jong ka Jylla.
Kat kum ka jingiathuh ki Pulit, kawei ka ktem jong ka United Kuki Liberation Front (UKLF) bala shu ieh shrah, kala shah thang ha ki paidbhur ha ka miet sngi U Blei ha Sugnu, Kakching District.
Kane ka long ruh kum ka jingpynhiar kput ia kane ka kynhun kaikhlaw kaba la wiang ding ia bun tylli ki Iing bala ieh da ki paidbah bap het wir kynthup ka iingsah u Myntri barim bad MLA ka Congress K Ranjit, kaba don ha Serou, Kakching District ha ka miet sngi Saitjain.
Ha kawei pat ka jingjia, ki shipai kila ioh ban pynpra ia ka ktem jong ki kaikhlaw UKLF kaba don ha Nazareth, kaba don marjan ka Chandel bad Kakching District ha ka sngi sngi U Blei.
Shuwa kane, kala mih ruh ka jingiather kuli kaba jur hapdeng ki shipai bad ki ehrang ka UKLF bad ki shipai kila lah ban behkrad ia ki ehrang na kane ka ktem.
Ha kajuh ka por, ka jingkhynra mynta kala iaid shakhmat ha ki jaka lum jong ka Jylla Manipur ban kyndang ia baroh ki ehrang kaikhlaw kiba pyntriem ia ki riew paidbah.
