Imphal, Nailar 02: Ki bor pahara kila pynjur iaka jingpahara ha Churachandpur District Manipur namar ka seng riewlum kan pynlong iaka jingtep paidbah ia ki briew naka jaidbynriew Kuki kiba iap ha ka jingiaumsnam ha kane ka jylla.
Ki nongialam seng riewlum kila pyntip ba kin pynlong iaka jingleh donburom khatduh bad ka jingleit ontep iaki briew naka jaidbynriew Kuki-Zo hapoh ka madan Peace Ground Tuibuong (Lamka) kaba don ha Churachandpur District.
“Ngi don kumba 30-35 tylli ki met iap hapoh ka jaka buh metiap ha Lamka Morgue bad lada ka sorkar ka aiti noh iaki metiap ngin tep don burom lang. Ngi kwah ban ai burom khatduh iaki ba khlad” la ong ka kyrwoh na u nongaiktien ka Indigenous Tribal Leaders’ Forum (ITLF) u Ginza Vualzong.
Ula ong “Ki don bun tylli ki metiap naka jaidbynriew Kuki hapoh Regional Institute of Medical Sciences bad ha Jawaharlal Nehru Institute of Medical Sciences Imphal. Ngi ka kyrpad iaka sorkar ban wan shimti noh ia ki metiap naka bynta ban pynlong ka jingleh donburom bad ka jingleit ontep khaduh haka 3 tarik mynta u bnai”.
La suba ba kan don ka jingialang ba heh ka ban pynlong daki riewlum ha Churachandpur haka 3 tarik mynta u bnai naka bynta ban leit ontep donburom ia kito kiba la khlad.
Naka liang ki Pulit kila pyntip ba ki bor district kila pynbun iaki bor pahara hajan ka jaka leit ontep bad ha ki jaka markhap naka bynta tehlakam ia ki jingkulmar.
Haba iadei bad kane naka liang ki seng naka jaidbynriew Meitei kila pynpaw ka jingpyrshah ia kane ka jingthmu ban leit ontep bun tylli ki met iap ha ka juh ka jaka.
Ki nongialam ka Coordinating Committee on Manipur Integrity (COCOMI) jong ka jaidbynriew Meitei kila ong ba ki nongialam naka jaidbynriew Kuki kim dei ban ialehkai Politiks iaki metiap.
“Ia baroh ki met iap jong ki briew naka jaidbynriew Meitei la tep hala ki shnong ha ryngkat ka jingleh donburom katkum ka jingngeit daki bahaïing, naka liang ki nongialam naka jaidbynriew Kuki ruh kidei ban iaid ka juh ka lynti haba iadei bad ka jingleh don burom khatduh iaki ba khlad” la ong ka kyrwoh jong ka COCOMI.
U nongialam ka COCOMI ula ong ba ka jingkyntur pud shaka jaka sorkar ka logn beain bad ka jingleit ontep ia baroh ha ka juh ka jaka kaba dei ruh jong ki jaidbynriew Meitei kan wanrah biang ka jingiapher jaidbynriew.
“Naduh 3 tarik Jymmang ka jingiakynad kala sdang bad haduh mynta ki seng naka jaidbynriew Kuki kim pat leh ia kano kano ka kam kaba pdiang daka ain jong ka jylla” la ong u nongialam ka COCOMI.
Ka COCOMI ka kyrpad iaka sorkar ban leh eiei halor kane katkum ki kyndon jong ka ain ha Manipur.
“Ngi dawa naka sorkar ban eksamin iaki metiap hashuwa ban tep ha man la ki shnong ban pynthikna iaka jinglongtrei shnong ha katkum ki kyndon ain” la ong ka COCOMI.
