Imphal, Nailar 02 : Ka Congress kaba don ha Liang Pyrshah ha ka sngi Balang, kala dawa ia ka Sorkar Manipur bala ialam da ka BJP ba kan pynshai ia ka nongrim jong ka halor ka jingdawa jong uwei u MLA ka BJP Paolienlal Haokip ban phiah noh ia ka Manipur sha ki 3 tylli ki Union Territories khnang ban wanrah pat ia ka jingshongsuk ha kane ka Jylla.
U Haokip u dei uwei na ki 10 ngut ki MLA (kynthup ia 7 ngut jong ka BJP) ha ryngkat kiwei ki seng jong ki riewlum, naduh ka 12 tarik Jymmang kila dawa ban pynkha noh iala ka jong ka bor synshar khaddar (ba iasyriem kum la ka jong ka Jylla) na ka bynta ki riewlum, kiba don haduh 40% n aka 3 million ngut ki nongshongshnong ka Manipur.
U Vice President ka Congress-Manipur Hareshwor Goswami haba kyntait ia ka jingdawa u Haokip, ula pyntip ba ki kaikhlaw Kuki-United People’s Front (UPF) bad ka Kuki National Organisation (KNO)-kila iashong jingialang dang shen bad ka Ministry of Home Affairs ha kaba la mih ruh ka jingdawa ban pynkha noh ia ki union territories.
U Advisor ka Home Ministry AK Mishra ruh ula iadonlang ha kane ka jingialang kaba la long ha New Delhi.
Haduh 23 tylli ki kynhun kaikhlaw kiba iatrei lang bad ka UPF bad KNO-8 tylli hapoh ka UPF bad 15 ha ka KNO, kila don hapdeng ka soskular Suspension of Operation (SoO) bad ka Sorkar India naduh u Nailar, 2008.
“Ka Sorkar Pdeng bad ka Sorkar Jylla lem bad ka BJP ki dei ban pynshai halor ka jingdawa u Haokip ban pynkha ia lai tylli ii Union Territories da kaba phiah ia ka Manipur ki ban long na ka bynta ki Meitei, Kuki bad ki Nafa” ong u Goswami.
