Imphal, Jylliew 20: Khyndai ngut ki MLA na ka Jaidbynriew Meitei kila hiar sha Delhi ha ka sngi Nyngkong bad aiti ia ka dorkhas ba 5 tylli ki mat sha u Myntri Rangbah Duh ka Ri Narendra Modi, haba dawa ruh ban phah noh da ki Central Para Military Force (CPMF) ba kin iaid pahara ha ryngkat bad ki Pulit ka Jylla ha ki jaka ba jur ka jingia umsnam.
Kine ki khyndai ngut ki MLA kila pan por ban iakynduh ia u Myntri Rangbah Duh ha ka sngi Palei bad kila ioh ruh ia ka jubab ha kane ka juh ka sngi. Hynrei, namar u Myntri Rangbah Duh un mih leit jingleit shabar Ri ha ka 20 tarik Jylliew, na ka bynta ka bha ka miat ka Manipur, ka kynhun kala shu aiti noh ia ka dorkhas ha ka sngi nyngkong.
Kane ka dorkhas kala kyrpad ruh ia u Myntri Rangbah ba ka jingdawa bor pyniaid la ka jong da kano kano ka Jaidbynriew, kam dei ia kaban pdiang la ka long kumno kumno ruh bad ba ym dei ban pynthut ia ka jingialong kawei hapoh ka Jylla.
“Ka jingpyntrei pyrrkhing ia ki kyndon ka SoO bad ki kynhun kaikhlaw Kuki, ka jingtehlakam ba pyrrkhing bha ia ka jingwan rung bad jingdonkti ki CDF (Chin-Kuki Defence Force ) ha kane ka thma iakynad jaidbynriew kaba long kat kum ka jingsngew u paidbah babun balang. Ia kine ki kam dei ban khein kum ka National Security” ong ka dorkhas.
Kine ki MLA kiba la leit aiti ia ka dorkhas ki kynthup ia u Karam Shyam Singh-MLA Langthabal AC; Th Radheshyam Singh-MLA Heirok AC; Nishikant Singh Sapam- MLA Keishamthong AC; Kh Raghumani- MLA Uripok AC; P Brojen- MLA Wangjing Tentha AC; T Robindro- MLA Thanga AC; S Rajen-MLA Lamsang AC; S Kebi Devi- MLA Naoriya Pakhanglakpa; bad Y Radheshyam- MLA Hiyanglam AC.
