Imphal, Nohprah 20: Lai tylli ki Sengbhalang ka Manipur kila phah ia ka dorkhas sha u Myntri Rangbah Duh ka Ri Narendra Modi ba un “ai jingiada ia ki jingim, ka jinglong laitluid bad ki nongkynti jong ki nongshongshnong ka Manipur” da kaba wanrah ia ka jingpynkut noh ia ki kam iaumsnam ba jia hapoh ka Jylla.
Ia kane ka dorkhas la phah da ka Delhi Meetei Co-Ordinating Committee (DMCC) ha ryngkat ka Meitei Alliance (MA) bad ka Global Manipur Federation (GMF).
Ia kane ka dorkhas la aiti naduh ka 17 tarik Nohprah hadien ka jingiashong kyllain mungor ha Delhi ban wanrah ia ka jingsuk bad jingshngain hapoh ka Jylla, kaba la don hapdeng ka jingiaumsnam naduh ka 3 tarik u Jymmang.
Kine ki Seng kila kren ruh halor ka jingwan rung beain ki kaikhlaw Kuki-Chin shapoh ka Jylla na Myanmar haba bynrap ba ki Meitei kiba sah ha kylleng ka pyrthei, kila pynsawa ia ka sur namar kam shym la don ka sienjam ban iada ia ka jingim, ka jinglong laitluif bad ka nongkyntijong ki paidbah ka Manipur nalor ka jingia im lang hapdeng ka jingsuk.
Ka dorkhas kala ong “Ka jingdawa jong ngi ka sawa jam bad shai kdar……Pynkut noh ia ki kam iaumsnam ha Manipur kaba la khie naduh ka 3 tarik Jymmang 2023, iada ia ki jingim, ka jinglong laitluid bad ki nongkynti jong ki paidbah ka Manipur, iada ia ka jingia imlang hapdeng ka suk ka sain ha Manipur”.
U Modi un dang ban leit iuhkjat sha Manipur naduh ba khie ka kam iaumsnam ha ka 3 tarik Jymmang, kaba la shim haduh 194 ki mynsiem briew bad pynkylla phetwir ia palat 67,000 ngut ki briew kiba dei na baroh ar Jaidbynriew kata ki Meitei bad ki Kuki-Zo.
