Imphal, Rymphang 11: Ka Sorkar Manipur ka la pynmih ia ka jingkyrpad sha baroh ki nongshong shnong ba kin long kiba jai jai bad ban kiar na ka jingngeit ia ki khubor kiba bakla, ki khubor hamsaïa, lane ki khubor ki bym pat lah ban pynshisha kiba lah ban pynthut ia ka shongsuk shongsain hapoh ka Jylla.
Ha ka kyrwoh ba la pyllait da u Chief Secretary PK Singh u la pynpaw ia ka jingsngewkhia halor ki jingmih ki jingialam bakla kiba la pynphriang lyngba ki lad bapher bapher, kaba wanrah ia ka jingkulmar bad jingbym shongsuk hapdeng ki nongshong shnong.
Ka Sorkar Jylla ka la maham ba ki don katto katne ki briew bad ki kynhun kiba pyrshang da kaba thmu ban pynmih jingkulmar bad pynphriang ïa ka jingtieng lyngba ki jingtip kiba bakla bad ki jingïathuh khana kiba pynkhihwin iaki paidbah.
“Kine ki jingpyrshang ba sniew ki dei kiba la leh da ka jingthmu ban thaw jingkulmar. Ngi kyntu jur ïa ki paidbah ba kim dei ban sngap ïa kum kine ki jingpyntip kiba bakla ne jingpyntip ba thmu pynkulmar” la ong ka kyrwoh.
Ban ialeh pyrshah ia kane ka jingma bad ban pynthikna ia ka jingpynsaphriang ia ki jingtip kiba thikna, ka Sorkar ka la buh ia ka Control Room kaba 24×7 bad la kyntu ia ki paidbah ban pynshisha ia kino kino ki khubor ne jingtip da kaba phone sha ka Control Room ha u number 9485280419.
Ka Sorkar ka la maham ba ia kino kino ki jingpyrshang ban pynmih ia ka jingiakynad ne pynthut ia ka jingshongsuk yn sa leh da kaba tyngeh katkum ki kyndon ain.
Ka jingkyrpad ka la leit ruh sha ki nongïalam shnong, ki seng bhalang, ki khlieh niam, ki kynhun samla pule, ki riewstad, bad ki nongshong shnong ba rit paid ban wanrah ïa ka jingïatylli bad ban trei ha ka ban tei pat ïa ka jingshaniah ha kylleng ki shnong.
“To ngin buh hakhmat eh ia ka jingsuk, ka jingsngewthuh jingmut, bad ka roi ka par na ka bynta ka jingbha jong ka Jylla baieid jong ngi,” la kyntu ka kyrwoh.
