Imphal, Naiwieng 30: 7 ngut ki briew kila shah kem halor ka jingshah thombor ka thanad ha Kakching, kaba la jia ha ka 27 tarik Naiwieng bad lam sha ka jingmynsaw jong 2 ngut ki pulit.
Kiba shah kem ki kynthup Naorem Jotish Singh (30 snem), Kshetrimayum Rajiv Singh (50 snem), Pravin Leishangthem (31 snem), Pukhrambam Gopen (32 snem), Naorem Sitaljit Singh (33 snem), Wayengbam Johnson Singh (31 snem), bad u Kshetrimayum Ashokumar (31 snem).
La iathuh ba ka jing thombor iaka thanad Kakching ka dei ka jingpyrshang ban pynbor ban pyllait noh ia saw ngut ki briew kiba la shah kem ha ka 16 tarik Naiwieng namar ba ki la pynjulor ia ki mar ki mata jong uwei u MLA.
Ha kawei pat ka khubor, la iathuh ba ki bor pahara kila ïoh kurup ïa ki tiar siat na S Mongpi Ridge ka ba hap ha ka distrik Kangpokpi.
Kine ki tiar kiba la ioh ban kurup ki kynthup ia kawei ka suloi 303, kawei ka pistol 9mm ba la shna ha China, ar tylli ki suloi SBBL, kawei ka Magazine INSAS LMG (5.56mm), ryngkat bad ki tiar pynbthei bapher bapher.
Ki bor pahara ki la pynjur ïa ki kam pyrshah ïa ki lehnoh, da kaba shim ïa ki lad ki lynti kiba heh ban ïada na ka jingkulmar kaba jur bad ban pynthikna ïa ka jingshong suk shongsaiñ ha kane ka thaiñ.
