Imphal, Nailar 06 : Ki Pulit ka Manipur kila ioh ban kurup haduh 1195 tylli ki suloi bad 14332 tylli ki kuli ha ka jingkhynra bala pynlong ha ki jaka ba jur bha ka jingiaumsnam hapoh ki District bapher bapher ka Manipur.
“Ngi la ioh kurup biang haduh 1057 tylli ki tiar siat bad 14201 tylli ki kuli na ki Valley District bad 138 tylli ki suloi bad 121 tylli ki kuli na ki hill District” ong ki Heh Pulit.
Ha ka 5 tarik Nailar, kala don ka jingthombor bad rong tuh ia ki tiar siar na ka kynhun ki Pulit ha Toupokpi Police Outpost bad ha Lilong Chajing, Imphal West.
Shuwa kane, palat 4000 tylli ki tiar siat bad ki kuli kila shah tuh na ki jaka buh tiar siat jong ki bor pahara ba la phah sha Manipur, kaba la jia ruh ha ka por ba dang thnem bha ka thma iapher jaidbynriew hapdeng ki Kuki bad ki Meitei.
Ki bor pahara kila pynjur bha ia ka jingkhynra ha ki District bapher bapher bad kila ioh ban kurup ia bun bah ki tiar kiba shah tuh na ki jaka buh tiar ki bor pahara bad Pulit.
