Imphal, Iaiong 20 :Ha kawei pat ka jingjia kaba la ktah jur ia ka sorkar BJP ha Manipur, sa uwei pat u MLA u P Brojen Singh u la hiar shuki noh kum u chairman jong ka Manipur Development Society mynta ka sngi 20 tarik.
U Brojen u ba la shah jied kum u MLA na Wangjing Tentha Assembly constituency kaba hap hapoh Thoubal district u la pynpaw ia ki daw shimet ha lyndet kane ka jingiehnoh kasm ka jong u.
“Nga la aiti ia shithi ban iehnoh na ka kam chairman jong ka Manipur Development Society (MDS) Imphal namar ki katto katne ki daw shimet,” pynpaw u Brojen ha ka shithi iehnoh kam ka jong u.
Kane ka jingiehnoh kam jong u Brojen ka la wan long ha ka por ba ki katto katne ki MLA kiba la shah jied khasmtam na ki nongshong shnong kiba dei ki Kuki ki la dep don lypa ha New Delhi, ban dawa ia ka jingtuklar da ki nongialam ka sorkar pdeng hadien ba ki la pynpaw ka jingbym sngewhun ia ki nongialam ba mynta ka jylla halor ka jingkynnoh kiba iadei bad ki jingtreikam ki bym khuid bad halor ka jingbym lah ban pynurlong ia ki jingkular.
U Thokchom Radheshyam uba la iehnoh ia ka kam kum u nongaibuit ne advisor jong u CM N. Biren Singh u la kynnoh ba ka la don ka jingsynshar leh donbor hapoh Manipur kaba la pynlong ia kiba bun ki nongmihkhmat ba kin pynpaw ia ka jingbym sngewhun.Ki kwah ban wanrah ia ka jingkylla, kata la ka long ha kaba iadei bad u CM lane ki nongialam ka party ka jylla. “Lada ngi kwah ia ka jingtreikam kaba khuid ba suba, kaei kaei kaba ngi lehnoh, kaei kasba ngi kren, kaei kaba ngi pyrkhat ha ki jingmut jingpyrkhat ki jong ngi ki dei ban long kumjuh katkum ki kam,” ong u Thokchom lyngba ka rynsan social media.
Sa uwei pat u nongialam ka BJP u Karam Shyam uba la iehnoh na ka kam chairman ka tnat Tourism Corporation ha ka 17 tarik mynta u bnai u la pynpaw lyngba ka social media ba ki nongialam ba halor ka sorkar jylla kim shym la shim mar kumjuh ia ki para dkhot bad ba ka jingbyrthen jong ki nongialam pyrshah iala ki jong ki dkhot ka long ka bym lah ban pdiang.
Shuh shuh u Shyam u la ong ba na ka liang u CM Biren Singh u la kular ban tei ia ka jaka sah kynmaw hapoh ka constituency ka jong u hynrei hadien u la kyntait ia kane ka jingkyrpang ka jong u.
